Tuesday, March 29, 2016

நாத்திகரா மாறிடுங்க!

பசீரம்மா வீட்டு வாசலிலேயே பத்து நிமிடமாக  நின்று கொண்டிருந்தார்.

“ம்ச்.. இந்த மனுஷன் எங்க போனார்.. மணி மூணாச்சு... இன்னும் சாப்பிட வரக்காணோமே? சாப்பாடும் சாப்பிடாம மாத்திரையும் சாப்பிடல... எல்லாம் ஆறிபோச்சு.. இப்ப மறுபடி சூடு பண்ணனும்... சிலிண்டர் விக்கிற விலையில் ஒரு வேளைக்குப் பத்து முற சூடு பண்ணா என்னாகறது?”

வேறொன்றுமில்லை.. காலை டிஃபன் சாப்பிட்டுவிட்டு வெளியே சென்ற பசீர் பாய் இன்னும் வீட்டுக்கு வரலை.. அந்த விஷயத்தில் பசீரம்மாக்கு இத்தனை நுண்ணிய பிரச்சினை எல்லாம் யோசிக்க வருகிறது.

அதோ வந்துவிட்டார் பசீர் பாய்... லேட்டானதுக்கு பசீரம்மாகிட்ட திட்டு நிச்சயம்னு தெரிந்தும் கொஞ்சம் கூட கலக்கமில்லாமல் உற்சாகமாய் வருகிறாரே?? பசீர் பாய்க்கு அவ்வளவு தைரியம் எப்படி வந்தது??

“எங்கே போனீங்க இவ்ளோ நேரம்?”

“உள்ள வாம்மா.. ஏன் வெயில்ல நிக்கிற.. பாரு.. உனக்கு எப்படி வேர்த்து ஊத்துதுன்னு”

ஐஸ்.

”எல்லாம் எனக்குத் தெரியுது.. கேட்ட கேள்விக்குப் பதில் இன்னும் வரல”

”அதுவா... அது ஒரு பெரிய கதை.. முதல்ல சாப்பிடுவோம்.. ரொம்ப பசிக்குது” , பாவமாய்ச் சொன்ன பசீர்பாயைப் பார்த்ததும் பசீரம்மாவின் கோபம் தணிந்தது. சாப்பாடு எடுத்து வைத்த வேகத்தில் காலியானது.

“ம்ம்.. இப்போ சொல்லுங்க... எங்க போனீங்க.. எதும் பிரச்சினையா”

"அது ஒண்ணுமில்ல பசீரம்மா.. நம்ம நவீனத்துவன் அண்ணே இருக்காகல்ல.. அவுக நாத்திகவாதின்னு தெரியும்தானே... இன்னைக்குப் பேச்சு வாக்கில் கடவுள் இருக்கானா இல்லையான்னு ஒரு டாபிக் வந்துச்சு.... நானும் எவ்வளவோ சொல்லிப்பார்த்து மாய்ஞ்சுட்டேன்... எதுக்குமே பிடி கொடுக்காம தான் சொன்னதையே சொல்லிட்டு இருக்காரு நவீனத்துவண்ணே. எனக்கும் பசி வயித்தைக் கிள்ளுச்சா.. சரி சாப்பிட்டுட்டு வந்து மறுபடியும் பேசுவோம்னு ரெண்டு பேரும் லஞ்ச் ப்ரேக் விட்டிருக்கோம். 

அவர்கிட்ட என்ன பேசி.. எப்படி புரிய வைக்கிறது.. ஒண்ணும் புரியல” என்றார் கவலையுடன் பசீர் பாய்.

“அவ்ளோதானே... நான் சொல்ற ஒரு பாயிண்டை மட்டும் அவர்கிட்ட சொல்லுங்க... அப்படியே வாயடச்சுப் போய் சரண்டர் ஆகிடுவார் பாருங்க”

“என்ன இவ்ளோ ஈசியா சொல்லிட்டே.. எப்படி பந்து போட்டாலும் சிக்சர் அடிக்கிறார்.. உனக்கு அவரைப் பத்தி தெரியாது....”

“நாத்திகவாதிகளிடம் பேசும்போது அவர்கள் இம்மையில் நடக்கும் விஷயங்களுக்குத் தான் அதிகம் முக்கியத்துவம் கொடுப்பாங்க.. நாமளும் அவங்க போற போக்கிலேயே பேசுவதால் அவர்களுக்குப் புரியவைக்க முடியுறதில்ல... ஆனா... நம்ம கையில் இருப்பதும் சரி.. நாம முக்கியத்துவம் கொடுக்க வேண்டியதும் சரி.. அது மறுமை ஒண்ணுதான்.. அதைப் பற்றிப் பேசினால் நாத்திகவாதிகளின் வாயை அடைத்துவிடலாம்.. அதனால நான் சொல்ற மாதிரி போய்ப் பேசுங்க” என்று சில வாக்கியங்கள் எவ்வாறு முன்வைப்பது என்று விளக்கினார்.

“ம்ம்.. அதுவும் சரிதான்...அருமையான பாயிண்ட்.. நீ சொன்னமாதிரியே சொல்றேன்.. அல்லாஹ் அவருக்கு நிச்சயம் புரியவைப்பான்”


பசீர்பாய் டீக்கடைக்கு வந்து சேர்ந்த அடுத்த நிமிடம் நவீனத்துவனும் வந்தார். இதுவரை நடந்த சுற்றில் வெற்றி பெற்றிருந்தாலும் நவீனத்துவனின் முகம் வாடிப்போயிருப்பதைக் கண்ட பசீர்பாய் பேச்சு கொடுத்தார். “என்ன அண்ணே.. சாப்பிட்டாச்சா? நல்ல சாப்பாடு போலயே இன்னைக்கு வீட்ல?”

கேட்டதுதான் தாமதம்.. உலகின் மீது அவர் கொண்டிருந்த கோபம் மொத்தத்தையும் வெளிப்படுத்திவிட்டார் நவீனத்துவன். 

“ஆமா பாய்... தனிமனிதனா நான் நல்லா இருக்கேன்...நல்லா சாப்பிடுறேன்.. ஆனா, உலகம் படும்பாட்டைப் பார்த்தா அதை முழுசா அனுபவிக்க முடியலையே”

புருவங்கள் உயர்த்தியவராக, பசீர்பாய் “என்ன சொல்றீங்கண்ணே.. ஒண்ணும் புரியலயே.. வீட்ல அண்ணி, அம்மாப்பா சுகம் தானே?”

”ஏன் பாய்... ஒரு மனுஷன் கவலைப்படறான்னா, அது அவன் குடும்பத்தைச் சுத்தி தான் இருக்கணுமா?”

சரிதான்... அண்ணன் ரொம்பவே கோபமா இருக்கார்... கொஞ்சம் அடக்கி வாசிப்போம் என நினைத்தவராக, “ம்ம் நீங்க சொல்றதும் சரிதாண்ணே”

“நாலு வயசுப்பிஞ்சுண்ணே.. அந்த பிஞ்சுக கூட நிம்மதியா இருக்க முடியல இந்த உலகத்துல... நாமல்லாம் இருந்து என்ன பாய் பிரயோசனம்?”

”நாலு வயசுக் குழந்தையாஆஆ.. என்னாச்சுண்ணே.. சொல்லுங்க.. நான் ஒரு நியூசும் கேள்விப்படலயே”

”ஒரு பக்கம் ஒருத்தன் ரேப் பண்ணிட்டான்.. இன்னொரு பக்கம் பெத்தவளே மகளைக் கொன்னுருக்கா ..இதெல்லாம் பார்த்தா செஞ்ச எல்லாரையும் நானே நேரே போய் செஞ்சிடுவேன் போல ... அவ்ளோ ஆத்திரம் வருது பாய்..”.

”பொறுமையா இருங்கண்ணே.. இந்த நியூசெல்லாம் கேட்டா நாளுக்கும் தூங்கவும் சாப்பிடவும் முடிய மாட்டேங்குது....”

”ஆமா பாய்... ஒரு நாளோட இந்த நியூசெல்லாம் நாம மறந்துடுறோம்.. அதான் இந்த மாதிரி அடிக்கடி நடக்குது.. சரியான தண்டனை இல்லாததுதான காரணம்?? என்ற நவீனத்துவன், கிசுகிசுத்து, “பாய்... நாமளே அந்த படுபாவியைக் காதும் காதும் வச்ச மாதிரி முடிச்சுடுவோமா? அப்பதான் பாய் எனக்குத் தூக்கம் வரும்”

சற்றே அதிர்ந்தவராக, இது சமூகத்தின் அவலங்களைக் காணும் துடிப்புள்ள ஒவ்வொருவருக்கும் நிச்சயம் தோன்றும் ஒரு எண்ணம்தான் என்பதை உணர்ந்தவராக அமைதியானார்.

“அண்ணே... இந்த நியூஸ்ல எல்லாம் கேஸ் போட்டிருக்காங்க.. சீக்கிரம் தண்டனை கிடைச்சிடும்.... சட்டப்படி தண்டனை கடுமையாக கொடுத்துடுவாங்க...இதுதான் உலக வழக்கம்.”

”ஹ்ம்ம்.. நல்லா கொடுத்தாங்க .. போங்க.. கொடுக்கிற தண்டனை மக்கள் மனசுல பாதிப்பு உருவாக்கியிருந்தா.. இந்நேரம் உலகம் நந்தவனமா மாறியிருக்குமே...பிள்ளையை இழந்து தவிக்குறாங்க அந்த தாய் தகப்பன். ஆனா அவன் மட்டும் கொஞ்ச நாளைக்கு ஜெயில்ல இருந்துட்டு வெளியவந்துடுவான். ஒரு உயிரை எடுக்கிற அதிகாரத்தை இவனுக்கு யார் கொடுத்தா? ஒரு உயிரை எடுத்த இவன் உயிரை நாம எடுக்கிறதில் என்ன தப்பு? கடவுள் உண்டுன்னு சொல்றீங்களே எல்லாரும்… இதுதான் உங்க கடவுளோட நீதியா நியாயமா?”

மென்மையாகப் புன்னகைத்தார் பசீர் பாய்.

”ஏதாவது கேட்டா இப்படி சிரிச்சிடுங்க… பதில் இல்ல இல்ல உங்ககிட்ட எல்லாம்.. அப்ப ஏன் பாய் அந்த கடவுளுக்கு ஜால்ரா அடிக்கிறீங்க? எங்கள மாதிரி ஏதீயிஸ்டா மாறிடுங்க பாய்.”

மென்மையான புன்னகை.

”இந்த மாதிரி தப்பு பண்றவங்கள விடவும் கடவுள் தண்டிப்பார்னு சொல்ற உங்கள எல்லாம் பார்த்தா தான் அதிகமா கோவம் வருது பாய். இல்லாத ஒன்றுக்காக, கண்ணெதிரே நடக்கும் அநியாயத்தைக் கண்டுக்காம இருக்கீங்க?”

”சரி.. நாங்க கடவுள் மேல பொறுப்பை ஒப்படச்சிட்டு அமைதியா பொறுமையா இருக்கோம்.. நீங்க என்ன பண்றீங்க அண்ணே?”

”போராட்டம் நடத்துறோம் பாய்.. யாருக்காகவும் நாங்க வெயிட் பண்றதில்ல… யார் மீதும் பழி போட்டு ஒதுங்கிறதில்ல..யாருக்கும் அஞ்சாமல் தப்பைத் தட்டி கேட்போம்”

”ஹா ஹா… அண்ணே… ஒருத்தன் தப்பு பண்ணா உங்களுக்கு வரும் அதே கோபமும் போராட்டமும் எங்க மத்தியிலும் இரு்க்கு… சொல்லப்போனா உங்கள விட அதிக பலம் எங்ககிட்ட தான் இருக்கு.. அது என்ன பலம் தெரியுமா? "

"அது என்னது பாய்..”

நீங்க போராட்டம் நடத்துறீங்க.. சரி.. ஏன்.. தப்பு செய்தவனுக்கு அதிகபட்ச தண்டனை கூட வாங்கித் தர்றீங்கன்னு கூட வச்சுக்குவோம். ஆனா, அவனால பாதிக்கப்பட்ட/உயிரிழந்தவருக்கு உங்களால் என்ன கொடுக்க முடியும்? அவன் இழந்தத நீங்க திருப்பி கொடுக்க முடியுமா? எனக்கு மட்டும் ஏன் இந்த அநியாயம்னு அவன் கேட்கிறதுக்கு உங்களால் என்ன பதில் சொல்ல முடியும்? ஊழல் பெருச்சாளிங்க எல்லாம் என் ரத்தத்தை உறிஞ்சுட்டு நிம்மதியா வாழ்க்கையை அனுபவிச்சுட்டு மண்ணுக்குள்ள போய்டுவாங்க... நான் மட்டும் என்ன பாவம் செய்தேன்? சுகங்களை அனுபவிக்க அவன் எந்த விதத்தில் என்னைவிட அதிக தகுதிவாய்ந்தவனாகி விட்டான்னு அவன் கேட்கிற ஒரு கேள்விக்காவது உங்களால் பதில் சொல்ல முடியுமா? 

ஊரை ஏமாத்தி உலையில் போட்டவன் இந்த உலகத்தை ஏமாத்திடலாம். ஆனா ஒரு பாவமும் அறியாத நானும் என் குடும்பமும் மட்டும் ஏன் கஷ்டப்பட்டு வாழணும்? நான் எந்த விதத்தில் தகுதியிழந்தவனாகிட்டேன்?? நான் இந்த உலகில் பட்ட கஷ்டத்துக்கு எனக்கு என்ன நீதி? எனக்கு என்ன இழப்பீடு? - பதில் இருக்கா உங்ககிட்ட?

அநீதி இழைக்கப்பட்டு உயிரோடு இருப்பவனுக்கு உங்களால் ஓரளவுக்கு நீதி தேடி கொடுக்க முடியும்? இறந்தவனுக்கு என்ன நீதி? உங்களால் என்ன கொடுக்க முடியும்? 

"......."

"ஆனா எங்க பிரார்த்தனை கொடுக்கும். அவங்க இழந்ததுக்கும் அதிகமா கூட கொடுக்க முடியும். தப்பு செய்தவனுக்கு மறுமையில் தண்டனையை அதிகப்படுத்திக் கொடுன்னு கேட்கும் பிரார்த்தனை. தக்க காரணமின்றி பாதிக்கப்பட்டவங்களுக்கு, அவங்க பொறுமைக்காக, அதிக நற்கூலி கொடுன்னு உரிமையோட கேட்கும் பலம். ஆமா.. அநீதி இழைக்கப்பட்ட ஒவ்வொருவருக்கும் எங்க இறைவன் மறுமையில் தக்க உயர்ந்த கூலி கொடுப்பேன்னு வாக்கு கொடுத்திருக்கான். அந்த வாக்குதான் பாதிக்கப்பட்டவங்களுக்கு மட்டுமில்ல... தப்பு செய்றவங்களுக்கும் அச்சாணி. பாதிக்கப்பட்டவனுக்கு அது  பெரும் ஆறுதல்.. பாதிப்பு ஏற்படுத்துறவனுக்கு அதுவே கடும் எச்சரிக்கை.

இதுவரை கேட்டிராத தண்டனை காத்துக்கிட்டு இருக்குன்னு தெரிஞ்சா ஒரு பூனைக்குக் கூட பாவம் இழைக்க முடியாது.நம்ம ஊரில் நடக்கும் அநீதிக்கு மட்டுமில்ல அண்ணே.. உலகத்துல எந்த மூலையில் அநியாயம் நடந்தாலும் ஆறுதலுக்காகவும் தண்டனைக்காகவும் இதே அணுகுமுறை தான்.

இந்த உலக நீதிபதிகள் தவறிழைக்கலாம். ஆனால் அகில உலகின் நீதிபதி ஒரு போதும் தவறிழைக்க மாட்டான்.

நாங்க கடவுள் இருக்கிறான் என்பதை நம்பியதால் இந்த உலகில் நடக்கும் அநீதங்களுக்குத் தக்க தண்டனை கிடைக்கும் என்று நம்புறோம்.

உங்களைப் போன்றவர்கள், இந்த உலகில் நடக்கும் அநீதங்களுக்குத் தக்க தண்டனை கிடைக்க வேண்டும் என்று உண்மையாகவே விரும்பினால், கடவுளை நம்புங்கள்; அவன் தீர்ப்பு நாளில் அளிக்கவிருக்கும் நீதியை நம்புங்கள்.”

தன் பாயிண்டுகளைப் பட படவென எடுத்து வைத்த பசீர்பாய், நவீனத்துவனின் முகத்தை ஏறிட்டு பார்த்தார். அதில் ஈயாடவில்லை.

அடேங்கப்பா.. நானா இவ்ளோ பேசினேன்… எல்லாப் புகழும் இறைவனுக்கே. பாயிண்ட் எடுத்துக் கொடுத்த பசீரம்மாவை நினைக்க நினைக்க பெருமிதம் கூடியது பசீர்பாய்க்கு.

உங்கள்  சகோதரி
பானு 
read more "நாத்திகரா மாறிடுங்க!"

Tuesday, March 15, 2016

உலகின் சிறந்த ஆசிரியை - பாலஸ்தீனத்தை உற்றுநோக்கச் செய்தார்

"ஒரு பாலஸ்தீன ஆசிரியையாக இந்த மேடையில் நிற்பதை பெருமையாக நினைக்கிறேன். ஒட்டுமொத்த பாலஸ்தீன ஆசிரியர்களின் வெற்றியாக இந்த விருதை ஏற்கிறேன். நாங்கள் அமைதியை விரும்புகிறோம், உலகின் சராசரி குழந்தைகளைப் போலவே எங்கள் குழந்தைகளும் அவர்களின் இளமைப் பருவத்தை அமைதியுடன் நிம்மதியாக கடப்பதை விரும்புகிறோம்"

                         இரு தினங்களுக்கு முன், ஒட்டுமொத்த பாலஸ்தீனத்தின் குரலாக , துபாய் விழா மேடையில் அப்பெண்ணின் குரல் ஒலித்தது. உலக நாடுகள் ஒடுக்க நினைக்கும் , அநீதிக்கு உள்ளாகியும் கண்டுகொள்ளப்படாத நாடான பாலஸ்தீனில் , அதுவும் அகதியாக வளர்ந்த பெண்ணுக்கு நோபல் பரிசுக்கு இணையான "உலகின் சிறந்த ஆசிரியை" என்ற விருதுடன் 1 மில்லியன் டாலர் பரிசும் வழங்கி கௌரவித்துள்ளது , வர்க்கி அறக்கட்டளை என்ற அமைப்பு.

                         இது ஆண்டுதோறும் உலகின் சிறந்த ஆசிரியராக ஒருவரை தேர்வு செய்து 10 லட்சம் அமெரிக்க டாலர்களை ரொக்கப்பரிசாக வழங்கி கவுரவித்து வருகிறது. 2ஆம் வருடமான இந்த ஆண்டும் உலகின் பல்வேறு பகுதிகளில் இருந்து பல சிறப்பான ஆசிரியர்களின் பெயர்கள் விருதுக்கு பரிந்துரைக்கப்பட்டன. ஜப்பான், இந்தியா, பின்லாந்து உள்ளிட்ட நாடுகளைச் சார்ந்த பத்து ஆசிரியர்கள் இறுதியாக தேர்ந்தெடுக்கப்பட்டு அவர்களில் ஒருவர் வெற்றியாளராக அறிவிக்கப்பட்டார் பாலஸ்தீன பெண். துபாயில் நடைபெற்ற பரிசளிப்பு விழாவில் கிறிஸ்துவ மதகுரு போப் பிரான்சிஸ் அப்பெண்மணியின் பெயரை அறிவித்தார். மகிழ்ச்சியாக , வன்முறையற்ற சமுதாயமாக , சமூகத்துடன் ஒன்றி வாழ ஒரு புதிய கல்வி முறையை விளையாட்டு சேர்ந்து குழந்தைகளை சென்றடைந்து பயன் பெற வைத்தமைக்காக அவருக்கு அந்த பரிசு வழங்குவதாகவும் அறிவித்தார்.  விருதினை துபாய் மன்னர் ஷேக் முஹம்மத் பின் ரஷீத் அல் மஹ்தூம் வழங்கினார்.  இளவரசர் வில்லியம், ஐ.நா சபை பொதுச் செயலாளர், பல நாட்டு அதிர்பர்கள் என்று பலரும் அவரின் இச்செயலை வாழ்த்தினர்.  ஹாலிவுட் சார்ந்த பிரபலங்களும்,  யூகே  பிரதமர் டோனி ப்லேர் உள்ளிட்ட பிரபலங்களும் இந்நிகழ்ச்சியில் கலந்துகொண்டனர். ஏன் அந்த பெண்மணிக்கு இத்தகைய விருது கிடைத்தது ?  என்ன தான் செய்தார் ?
 

                         ஹானான் அல் ஹோரப் தான் அந்த பெண்மணி. பெத்லகேமில் வன்முறை செயல்களுக்கு தொடர்ந்து பலியாகி கொண்டிருந்த அகதிகள் முகாமில் வளர்ந்தவர். அந்நாட்டில் தொடர்ந்து அரங்கேறி வரும் வன்முறை சம்பவங்களின் பாதிப்பு அவர் கணவர் , குழந்தைகளையும் விட்டு வைக்கவில்லை. ராணுவத்தினரால் அவரின் கணவர் தாக்கப்பட்டார். பள்ளி விட்டு வீடு திரும்பிக்கொண்டிருந்த போது ஒருவருக்கொருவர் சுட்டுக் கொல்வதைக் கண்டு அதிர்ச்சியுடன் வீடு திரும்பிய அவரின் பச்சிளம் குழந்தைகள் , அதன் பின் அவர்களின் மனநலனில் ஏற்பட்ட மாற்றத்தை கண்டு வருந்தினார். அவரின் குழந்தைகளை பழைய நிலைக்குக் கொண்டு வர எந்த கல்விமுறையும் கைகொடுக்கவில்லை. இதுதான் சகோதரி ஹனானை புதியதொரு பாதையை உருவாக்க தூண்டியது. அது போன்ற குழந்தைகளை வன்முறைக்கு ஆளாகாமல் வளர்க்கும் முயற்சியிலே கல்வி கற்க ஆரம்பித்தார். அவ்வாறு கற்று ஆசிரியையாக பரிமாணம் எடுத்தார். தன் குழந்தைகள் போல் வன்முறையில் அதிர்ச்சிக்குள்ளான குழந்தைகளுக்கு சிறப்பு பயிற்சி அளித்தார்.

                         தன்னுடன் வசிக்கும் அகதிகளான குழந்தைகளுக்கு பதற்றத்தை குறைக்கும் ஒரு கல்வி முறையை கண்டு பிடித்தார். விளையாட்டுடன் கூடிய கல்விமுறையில் எதிர்கால சிந்தனைகளையும் விதைத்தார். தன் குழந்தைகளின் சுயநம்பிக்கை மெருகேறுவதை உணர்ந்தார்.  சமூக சூழலுடன் ஒன்றிணைந்து சிந்திப்பதை கண்டு பூரித்தார். பாலஸ்தீன வகுப்பறைகள் எப்பொழுதும் ஒரு வித பதற்றமான சூழலிலே இருக்கும். "வன்முறையை ஒழிப்போம்" என்பதை தாரக மந்திரமாக முன்மொழிந்து அக்குழந்தைகளை அரவணைத்தார். அந்த குழந்தைகளுக்கு நம்பிக்கையையும், மரியாதையையும் , நேர்மையையும், அன்பையும் போதிப்பதிலே கவனம் செலுத்தினார். கல்வியின் முக்கியத்துவத்தை உணர்த்தினார். அவரின் முன்னோக்கு பார்வைகளை பல மாநாடுகளிலும், கருத்தரங்குகளிலும் கலந்து கொண்டு சக ஆசிரியைகளுடன் பகிர்ந்து கொண்டார். முழுமையான கல்வியால் வன்முறையை ஒழிக்க முடியும் என்று நம்பினார். கற்கும் திறனை மேம்படுத்தி , இது போன்ற சூழலில் வளரும் குழந்தைகள் எளிதாக கற்கும் விதமாக விளையாட்டினூடே கல்வி கற்கும் ஒரு புதிய முறையை அறிமுகப்படுத்தினார் . இதைப்பற்றி விரிவாக வி லேர்ன் அண்ட் ப்ளே (we learn and play ) என்ற புத்தகத்தில் எழுதியுள்ளார்.

                          பரிசை வென்ற ஹானான், பெத்லகேம் நகரில் உள்ள அகதிகள் முகாமில் வளர்ந்து, பெருமைக்குரிய பாலஸ்தீன ஆசிரியையாக இந்த மேடையில் நிற்பதை எண்ணிப் பெருமைப்படுவதாகவும் , பரிசுத்தொகையின் பெரும்பகுதியை தனது புதிய கல்விமுறையை மேம்படுத்தி, நாடு முழுவதும் நடைமுறைப்படுத்தவும், இதர ஆசிரியர், ஆசிரியைகளின் நலனுக்காகவும் செலவழிக்கப் போவதாகவும் அறிவித்தார். ஆசிரியைகளால் மாணவர்கள் அவர்களின் உலகத்தை புரிந்து கொண்டு அத்துடன் ஒருங்கிணைந்து வாழ வைக்க முடியும் என்று கூறினார். நாம் நினைத்தால் அக்குழந்தைகளுக்கு நல்ல ஒழுக்கத்தையும் , மதிப்பையும் கற்றுக்கொடுத்து அவர்களுக்கான அழகான உலகத்தை உருவாக்க முடியும். ஆசிரியைகள் மாணவர்களுக்கு அவர்கள் கேள்வி எழுப்பவும், விமர்சனம் செய்யவும், யோசிக்கவும், அவர்கள் தங்களை வெளிப்படுத்தவும் உதவ வேண்டும்" என்றும் கூறினார்.

                          " பாலஸ்தீனமோ அல்லது உலகின் எந்த பகுதியைச் சார்ந்த ஆசிரியர்க்கும் நான் சொல்லிக்கொள்ள விரும்பதுவது இதுதான், நமக்கான பணி மனிதநேயத்திற்கான பணி, நமது இலக்கு உன்னதமானதாக்கிக்கொள்ள வேண்டும், நம் மாணவர்களுக்கு நாம் கற்றுக்கொடுக்க வேண்டியதெல்லாம் " கல்வியறிவே சிறந்த ஆயுதம்" என்பதுதான். நமக்கு மறுக்கப்பட்டதும், நம்மிடமிருந்து பறிக்கப்பட்டதும் கிடைப்பதற்கு இதுவே மிகச் சிறந்த வழி" என்ற சகோதரி ஹனானின் முடிவுரையில் தான் எத்தகைய ஆழமான சிந்தனை. சுப்ஹானல்லாஹ்

                          போரினாலும் ,இன்ன பிற காரணங்களாலும் கல்வி கற்க முடியாத சமுதாயம் விரைவில் அழிந்து போகக்கூடிய சமுதாயமாக மாறும். கடினமான சூழலில் குழந்தைகளுக்கு கற்றுக்கொடுத்து ஒரு சமுதாயத்தை அழிவிலிருந்து காக்க போராடும் சகோதரிக்கு இஸ்லாமியப் பெண்மணி தளத்தின் பாராட்டுக்களும் வாழ்த்துகளும்.


உங்கள் சகோதரி
ஷிரின் பானு

நன்றி : globalteacherprize , wikipedia
read more "உலகின் சிறந்த ஆசிரியை - பாலஸ்தீனத்தை உற்றுநோக்கச் செய்தார்"

Tuesday, March 08, 2016

இஸ்லாமிய சாதனை பெண்களின் மகளிர் தினம்

          மகளிர் தினம்! அதிகம் அறிமுகம் செய்து வைக்க தேவையில்லை இந்த நாளை. சமூகவலைதளவாசிகளாகிய நம் பார்வைக்கு கடந்த இரண்டு நாட்களாக, இன்று உச்சமாக, இன்னும் இரு நாட்களுக்கு மழைவிட்ட தூவானமாக மகளிர்தினத்தை சிலாகித்து   நம் கண்ணில் பல   பதிவுகளைக் கடக்க கூடும்.  பல பட்டிமன்றங்களில் இன்றைய விவாதத் தலைப்பு 'பெண்களின் சுதந்திரம்' எனும் மையக் கருத்தைக் கொண்டிருக்கக் கூடும்.  எந்த சேனலை திருப்பினாலும்  பெண்களின்  மேன்மைகள் போற்றப்பட்டிருக்கும். போகட்டும்!

     பெண்களை அடிமைகளாகவே வைத்திருந்த காலகட்டத்தில், வேதங்களைத் தொடவும் அனுமதி மறுத்திருந்த அடிமைவாத கோட்பாடுகளின் உச்சகட்ட  சூழலில் பெண்களைப் பற்றி தனி அத்தியாயமே அருளி பெண்களைச் சிறப்பித்த  எல்லாம் வல்ல ஏகனின் மார்க்கத்திலிருந்து வார்த்தெடுக்கப்பட்ட எம் இஸ்லாமியப் பெண்களிடம் "மார்ச் 8 - சர்வதேச மகளிர்"  தினத்தினையொட்டி பெண்கள் சார்ந்த கருத்துக்களை கேட்டிருந்தோம்.  இதோ அவர்களின்  பதில்கள் ...


ஜலீலா கமால், துபாயில் வசிக்கும் தமிழகப் பெண்மணி. சமையல்கலை வல்லுநர்.   துபாயில் இருந்து சென்னைக்கு புர்கா வகைகளை இறக்குமதி செய்யும் வளர்ந்துவரும் பெண் தொழிலதிபர்.
கேள்வி : பெண்களாய் பிறப்பதற்கு பலர் சலித்துக் கொள்கிறார்களே?ஏன்?

பதில் :   பெண்ணாய் பிறந்ததற்கு நாம் அனைவரும் கொடுத்து வைத்திருக்க வேண்டும். பெண்கள் அனைவரும் ஏதாவது ஒரு துறையை தேர்ந்தெடுத்து அதில் உங்களை பிசியாக வைத்து கொண்டால் வாழ்வில் ஏற்படும் பல பிரச்சனைகள் மன அழுத்தம் ஆகியவைகளில் இருந்து விடுதலை பெறலாம். பெண்கள் கண்டிப்பாக தத்தம் சின்ன சின்ன செலவுகளுக்கு உரிய செலவுகளை நாமே பார்த்துகொள்ளும் அளவிற்கு சிறுதொழில் செய்து தொகை ஈட்டவேண்டும். இப்படியான பெண்கள் நிச்சயம் கொண்டாடப்படவேண்டியவர்களே. அவர்களுக்கெல்லாம் சலிப்பு வராது, மாறாக இன்னும் எப்படி முன்னேறலாம் என்பதில் தான் சிந்தனை ஓடும்.

முனைவர் சுமையா, சிறந்த சமூக சேவைக்கான விருதினை முதலமைச்சர் ஜெ. ஜெயலலிதா கையால் வாங்கிய கீழக்கரை தாசீம்பீவி கல்லூரி முதல்வர். 
கேள்வி : சாதனைப் பெண்ணுக்கான அளவுகோல் என்ன ?   பெண்களின் சாதனையில் ஆண்களின் பங்களிப்பு எப்படியிருக்க வேண்டும் என  நினைக்கிறீர்கள் ?

பதில்:   தன் வாழ்க்கைப் பயணத்தில்  வெற்றிகரமாக தன் குடும்பத்தை உருவாக்கும் போதும், இறைவன் தன் திருமறை குர்ஆனில் கூறியவாறு அவள் தனித்து விளங்கும் போதும்  ஒவ்வொரு பெண்ணும் ஒரு சாதனையாளர் தான். அல்லாஹ்வும் அவனுடைய தூதரும் கூறிய வழியில் அனைத்துப் பெண்களும் சாதனையாளர்களாக முயற்சிப்போம்! இன்ஷா அல்லாஹ்.

உண்மையில் ஆண்கள் பெண்களை புரிந்துகொள்கிறார்கள், அவர்களை பாராட்டுகிறார்கள். ஆனால் எத்தனைபேர் அவர்களின் தினந்தோருமான நடவடிக்கைகளில் மகிழ்ச்சியளிப்பது தன் மனைவிதான் என்கிறார்கள்?  ஊக்கங்கள் அதிகரிக்கையில் சாதனைகளும் அதிகரிக்கும்.

ஜபினத், நாவலாசிரியர், இஸ்லாமிய பெண் எழுத்தாளர்களில் குறிப்பிடத்தகுந்த இடத்தைப் பெற்றவர்,  சமூக ஆர்வலர்.
கேள்வி : பெண்களுக்கான கடமையின்  எல்லை என்ன ?

பதில் :  ஒவ்வொரு ஆண்டும் பள்ளிப் பொது தேர்வுகளில் ஆண்களை விட பெண்களே அதிகம் சாதிக்கின்றனர் ஆனால் பொருளாதாரத்தில் பெண்களின் பங்கு எத்தகைய இடத்தில் இருக்கிறது? ஒரு பைலட், ஒரு விஞ்ஞானி, ஒரு பஸ் ட்ரைவர், ஒரு ஆட்டோ ஓட்டுனர் போதுமா..? இத்தகைய பெரிய பிரபஞ்சத்தில் பெண்ணாளுமையை காட்ட..

பள்ளியிலும், கல்லூரியிலும் படிப்பில் ஆண்களை மிஞ்சும் பெண்கள் பொருளாதாரத்தில் என்ன சாதித்து இருக்கிறார்கள்...?

படித்து உலக அறிவைப் பெற்ற பெண்கள் வாழும் நாளில் நம் சமுதாயத்திற்கும் ஏதாவது செய்து விட்டு போக வேண்டும்.  பிள்ளைகள் பெறுவதும் குடும்பத்திற்கு நற்பெயர் வாங்கித் தருவதோடும் ஒரு பெண்ணின் கடமை முடிவடைந்து விடாது.  நாம் சார்ந்து வாழும் நாட்டின் ஒவ்வொரு பிரச்சைனகளின் தீர்வுகளுக்கும் தம் பங்களிப்பை நிலை நிறுத்த வேண்டும்.  அதுவே அவள் கொண்ட பெண்மைக்கும் பெருமையாகும்.

சித்தி ஆலியா,  நேஷனல் விமன்ஸ் ஃப்ரண்ட்( NWF)  முன்னாள் மாநில செயற்குழு உறுப்பினராக  இருந்து, இப்போது களப்பணியாற்றும் சமூக ஆர்வலர்
கேள்வி : பெண்கள் தினம் - முழுமையான சுதந்திரம் கிடைத்ததற்கான கொண்டாட்டத்திற்கானதாக எடுத்துக்கொள்ளலாமா?

பதில் : பெண்கள் தினம் ஒன்று இருப்பதே பெண்களுகான உரிமைகள் மறுக்கபடுவதற்கான சான்றுதான்....

அந்த தினத்தில் பெண்கள் தங்களை பெருமைபடுத்திக் கொள்வதைவிட இன்னும் எங்களுக்கு இது வேண்டும் அது வேண்டுமென்று தான் கோரிக்கை வைக்கிறார்கள். ஆபாச உடையணிந்து ஒய்யாரமாக நடந்து செல்வது தங்கள் உரிமை என்கிறார்கள் ஒருபுறம், மறுபுறம் பெண்களை ஆபாசபடுத்தி இழிவுப்படுத்துவதாக போராட்டம் நடத்துகிறார்கள். எது பெண்களின் சுதந்திரம் என்பதை அறியாதவர்களாகவே பெண்கள் மகளிர் தினம் கொண்டாடுகிறார்கள் .

பானு ஹாரூன், பாரம்பரிய இஸ்லாமிய குடும்பத்தைச் சேர்ந்த பெண்மணி,   தேர்ந்த எழுத்தாளர்.

கேள்வி :   பல பிரச்சனைகளில் உங்கள் பக்குவமான பதிவுகளில் யாருமே சிந்தித்திடாத தீர்க்கமான தீர்வுகள் காணமுடிகிறதே ?

பதில் : உணர்வு பூர்வமான எண்ணங்களை விடுத்து அறிவு பூர்வமான சிந்தனை, செயல்பாடுகளுடன் எந்த விஷயங்களையும் அணுக
பெண்கள் முயற்சிக்க வேண்டும்.

ஆஷா பர்வீன், களப்பணியாளர், சமூக ஆர்வலர். ஆலிமா  என பல துறைகளில் தன்னை பிரதிபலிப்பவர்.
 கேள்வி : மகளிர் தினத்தை     எப்படி நோக்குகிறீர்கள் ?

பதில் : இறைவன் படைத்த எல்லா நாளும் ஆண்,பெண் இருவருக்கானது தான்! பெண் உரிமைகள்  ஒடுக்கப்பட்ட மற்ற இனத்தவர்களுக்கு  வேண்டுமானால் அதை கொண்டாட தோணலாம்! ஆனால் இஸ்லாம் முழுமையாகத் தெரிந்த பெண்ணுக்கு எல்லாமே அவள் தினம்தான்!   மகளிர் தினம் ஒரு பொருட்டல்ல!

ஜரீனா ஜமால், வெல்பேர் பார்ட்டியின் தமிழக மகளிர் அணி தலைவி. சமூக ஆர்வலர், எழுத்தாளர். 
கேள்வி : ஒரு பக்கம்  மகளிர் தினம் இன்னொரு பக்கம் மகளிர் உரிமை சார்ந்த போராட்டம், இஸ்லாமிய சிந்தனை ரீதியில் எப்படி இதனை பார்க்கிறீர்கள் ?

பதில் : உலகம் முழுவதும் பெண்ணுரிமை போராட்டங்கள் நடந்து கொண்டுதான் உள்ளது. பெண்களெல்லாம் தங்களுக்கான உரிமைகளை பெற்றுவிட்டதாக சொல்லிக்கொள்ளும் மேற்கத்திய நாடுகளில் பெண்களுக்கெதிரான வன்முறைகள் அதிகம் உள்ளதாக கணக்கிடப்படுகிறது. "பெண்ணாகி வந்ததொரு மாயப் பிசாசாம்.

"கண்ணால் வெருட்டி-------யால் மயக்கி" என்று அன்றைய சித்தர்கள் பாடியபோது "கைறு மாதாஇத்துன்யா  அல் மர்ரத்துஸ் ஸாலிஹா "  என்றது இஸ்லாம். "உலக செல்வங்களிலே உயர்வானது பெண்கள்" என்று அவள் பெருமையை பறைசாற்றியது இஸ்லாம். இவ்வாறு இஸ்லாம் பேச்சுரிமை, படிப்புரிமை, எழுத்துரிமை,  சொத்துரிமை,  மணவுரிமை, தகுதியற்ற கணவனிடம் விடுதலைப் பெறும் உரிமை,  மறுமணம் செய்துகொள்ள உரிமை,  பதிப்புரிமை  தொழிலுரிமை போன்ற கணக்கில்லா உரிமைகளை வழங்கி அவளை ஆண்டு முழுவதும் பெண்கள் "நாள்" கொண்டாட வைத்துள்ளது

நிலக்கோட்டை Judicial மாஜிஸ்திரேட் நீதிபதி  ரிஷானா

கேள்வி : ஆணும் பெண்ணும் சமமல்ல என்பதில் அடிமைதனம் கோட்பாடு ஒளிந்துள்ளதாக கருதுகிறீர்களா?

பதில் : இல்லை. ஆண்களும் பெண்களும் வெவ்வேறு குணங்களைக் கொண்டவர்களே, மேலும் இவர்களை ஒப்பீட்டின் கீழ் கொண்டு வர முடியாது.  
உடற்கூறுகளின் அமைப்பின் படி ஆண் பெண்ணை விட வலிமையானவனே!  அதற்காக பெண்கள் அவர்களின் அடிமைகள் கிடையாது. ஆண் பெண்ணுக்கிடையே ஆத்மார்த்தமான மகிழ்வான தருணங்களை ஒருவரை ஒருவர் கொண்டாடும் போதும் குறைநிறைகளோடு  ஏற்றுக்ககொள்ளும் போதே  உணர முடிகிறது.  

பர்வீன்பானு அனஸ், ஆசிரியை மற்றும்  Burak group of companies-ன் இயக்குநர் .

கேள்வி : பெண்கள் தினம் பற்றி சிலாகிக்கப்படுகிறதே!?
பதில் :  பெண் என்பவள் ஒவ்வொரு நாளும், ஒவ்வொருவராலும் தாயாக, சகோதரியாக, மனைவியாக, மகளாக கொண்டாடப் பட்டுக்கொண்டு தான் இருக்கின்றாள்.

ஆனால் என்று ஒரு பெண் தன் சுயம் அறிந்து ,சமூகத்தில் தன் மீதான தேவை அறிந்து, பொய் சமூக கோட்பாடுகள், கண்ணுக்குத் தெரியாத போலி மன விலங்குகளை உடைத்து செயல்படும் நாள்தான் தினம் தினம் கொண்டாடப் பட வேண்டிய நாள்.

பர்சானா தஸ்லிம், சமூக ஆர்வலர், சென்னை வெள்ளத்தின் போது அமஞ்சிகரை பகுதியில் முழுகவனம் செலுத்தி உதவிகளைச் செய்தவர். 

கேள்வி : மகளிர்தினம் கொண்டாட தகுதியானவர் யார் ?

பதில் : வருடத்தில்  ஒரு நாளை கொண்டாடுவது  விஷயமல்ல,  அந்நாளை கொண்டாடுவதற்குரிய ஒரு கொள்கை, இலட்சியம் மற்றும் உணர்வு பூர்வமான  உந்துதலோடு கொண்டாடுவதில் தான் சிறப்பு  இருக்கிறது. நாம் சாதாரண மகளிராய் பிறந்து மனிதநேயத்தை மலர செய்ய, மனதார பாடுபட்டாலே மகளிர் தினம் கொண்டாடுவதில் மகிழ்ச்சி   கொள்ளலாம்.

மலிக்கா ஃபாரூக், கவிதை துறையில் தினம் தினம் ஏதேனும் விருதுகளையும், பாராட்டுகளையும் பெற்றுக் கொண்டே இருக்கும்  பெண்மணி. 
பதில்களையும் கவிதை வடிவிலேயே தருவதில் கைத்தேர்ந்தவர்.  மகளிர் தினத்தையொட்டி இஸ்லாமியப் பெண்மணியின் சிறப்பு பதிவிற்கு சிறப்பு  கவிதையொன்றுச் சொல்லுங்களேன் என வேண்டுகோள் விடுத்தோம்... அந்த கவியருவியின் சாரலில் சில துளிகள் :
உலக மகளிர் தின வாழ்த்துக்கள் சொல்லி மகிழும்  அதேநொடி,,,
ஓயாப்போராட்டத்தில்உலன்றபோதும் உயரத்துடிக்கும் மகளிருக்கு
ஒற்றை தினமாவது ஒதுக்கியவர்களுக்கு உளமார்ந்த நன்றிகள்
 உன்னத பெண்மைக்கு செல்லுமிடமெல்லாம் சிறப்பாயென்றால் ?

சாதிக்கும் ஒவ்வொரு பெண்மணிக்கு பின்னால் மட்டுமல்ல
சாதரண பெண்மணிகளுக்கு பின்னாலும் முன்னாலும்
இழிந்தவைக்கொண்டு ஈட்டிப்பேச்சால்  பெண்ணைச் சாய்க்க
ஈனமுற்ற ஊனமனம் கொண்டோர்களால் கொடுக்கபட்டு
ஆரா ரணத் தழும்புகளாய் ஆணியடிக்காது மாட்டியிருக்கும்
பத்தினியற்றவளென்ற பட்டங்களும்
நடத்தைகெட்டவளென்ற பதக்கங்களும்...

மாட்டிவிடப்பட்டவைகள் மாறுசெய்யப்பட்டவையென  
அச்சம்தவிர்த்து மேலேறும் பெண்மைகள்
மேதாவிகளாய் நற்பண்புகள் கொண்ட சாதனையாளராய்.
இழிச்சொற்கிலியில் சிக்கி சுமைச் சோர்வுக்குள் மக்கி
அச்சப்பிடியில் மாட்டியவர்களெல்லாம்
இருளறைக்குள் தன்னை திணித்து மூலையில்
முடக்கப்பட்டோர்களாய்....

பெண்ணே
உண்மை, உன்னதம் ,நேர்மை
உனக்காய் நீ உடுத்திகொள்ளும் ஆடைகள்
இறைநம்பிக்கை தன்னம்பிக்கை
உலகவாழ்வில் உனக்காய் கைகொடுக்கும் உரிமை[கை]கள்..
மீண்டுமெனது,,,
உலக மகளீர் தின வாழ்த்துகள்
உயர்வாய் பேணவேண்டும் பெண்மானங்கள்...



பேட்டி கண்டவர்:
ஆமினா முஹம்மத்


read more "இஸ்லாமிய சாதனை பெண்களின் மகளிர் தினம் "