Saturday, December 19, 2015

பேரிடரில் பேருதவிய இஸ்லாமியப் பெண்கள் ( ஆவணத் தொகுப்பு )

ற்று ஓய்ந்திருக்கும் சென்னை மற்றும் கடலூரின்  வெள்ள பாதிப்புகள் மனதில் ஆறுதலை விதைத்துள்ளது.  கடைகோடியில் இருந்த மனிதன் முதல் கோடீஸ்வரன் வரை அனைவரும் தன்னார்வலர்களாக மாறி சென்னையை மீட்டெடுப்பதில் முன்னிலை வகித்தார்கள்!

இது ஒருபுறமிருக்க,  எள்ளி நகையாடப்பட்ட இஸ்லாமியப் பெண்  சுதந்திரத்தின் உண்மை முகத்தை அனைவருக்கும் காட்டினர் எம் இஸ்லாமியப் பெண்கள். "அடுத்தொரு  மழை வந்தால்  உயிரும் உடமையும்  தொலைப்போமே" என பலரும் அலறியடித்துக்கொண்டு  சென்னை விட்டு வெளியேறிக்கொண்டிருக்க, தன் கணவனுடனும் சகோதரனுடனும் இணைந்து களப்பணியாற்றினார்கள்  . அத்தகைய பெண்களில் சிலரைப் பற்றிய தொகுப்பு தான் இந்த காணொளி !

read more "பேரிடரில் பேருதவிய இஸ்லாமியப் பெண்கள் ( ஆவணத் தொகுப்பு )"

Monday, December 14, 2015

இளவயது திருமணம் - ஏனிந்த அவசரம்

அஸ்ஸலாமு அலைக்கும் வரஹ்மதுல்லாஹி வபரக்காத்துஹு

வாழ்வின் அர்த்தங்கள் விளங்கத்தெரியாத மனநிலையில், போதிய க்குவமற்ற பருவத்தில் முடிக்கப்படும் திருமணங்கள் யாவுமே இளவயது திருமணங்கள் எனலாம். 

உளவியலில் மனவயது , கால வயது என்று இரு வகையாக வயது என்ற சொல்லைக் கையாள்வார்கள் உளவியலாளர்கள். கால வயதென்பது ஆ்ண்டுளின் அடிப்படையில் கணக்கிடப்படுவது மற்றும் மன வயது என்பது குழந்தைகளின் அறிவு,திறன்,ஆளுமைகளின் அடிப்படையில் கணக்கிடப்படும். இதனைத் தான் நம் முன்னோர் ஆளும் வளரணும் அறிவும் வளரணும் என சொல்லிவைத்துள்ளார்கள். திருமணத்திற்குத் தகுதியான வயது என்ன? என்பது பற்றி 4:6 வசனத்தில் தெளிவாகவே பெசுகிறது.

4:6. அநாதைகளை அவர்கள் திருமண வயது அடையும் வரை (அவர்கள் முன்னேற்றம் கருதி) சோதித்துக் கொண்டிருங்கள் - (அவர்கள் மணப் பருவத்தை அடைந்ததும்) அவர்கள் (தங்கள் சொத்தை நிர்வகிக்கும் ஆற்றல்) அறிவை பெற்றுவிட்டதாக நீங்கள் அறிந்தால் அவர்களிடம் அவர்கள் சொத்தை ஒப்படைத்து விடுங்கள்; அவர்கள் பெரியவர்களாகி (தம் பொருள்களைத் திரும்பப் பெற்று) விடுவார்கள் என்று அவர்கள் சொத்தை அவசர அவசரமாகவும், வீண் விரையமாகவும் சாப்பிடாதீர்கள். இன்னும் (அவ்வநாதைகளின் பொறுப்பேற்றுக் கொண்டவர்) செல்வந்தராக இருந்தால் (அச்சொத்திலிருந்து ஊதியம் பெறுவதைத்) தவிர்த்துக் கொள்ளட்டும் - ஆனால், அவர் ஏழையாக இருந்தால் நியாயமான அளவு சாப்பிட்டுக் கொள்ளவும்; மேலும் அவர்களுடைய பொருட்களை அவர்களிடம் ஒப்படைக்கும்போது அவர்கள் மீது சாட்சிகளை ஏற்படுத்திக் கொள்ளுங்கள் - (உண்மையாகக்) கணக்கெடுப்பதில் அல்லாஹ்வே போதுமானவன்.
இதற்கு குர்ஆன் இரு கருத்துக்களை நம்முன் வைக்கிறது. அனாதைகளின் சொத்துகளை நிர்வாகம் செய்பவா் அவா்கள் பருவ வயதை அடையும் காலம் வரை சோதித்து வரவேண்டும். சோதனை எதற்கு ? அவா்கள் அறிவு போதுமான முதிர்ச்சியைப் பெற்றுவிட்டதா? என்பதனை கண்டறிவதற்கே அந்த சோதனை. அடுத்து அவா்களின் சொத்துகளை அவா்களிடம் ஒப்படைக்கும் காலம், அவா்கள் பருவ வயதை அடைந்த பின்னர் தங்கள் காரியங்களை தாங்களாகவே நிர்வாகம் செய்து கொள்ளும் ஆற்றல் பெறும் காலம். அந்த ஆற்றலையும் திறனையும் பெற்றுவிட்டால் மட்டுமே அவா்களின் சொத்துகளை அவா்களிடம் ஒப்படைத்துவிடுமாறு குா் ஆன் பணிக்கிறது. இதனையே திருமணம் புரிவதற்கான வயது என்பது ஓா் ஆணுக்கும் பெண்ணுக்கும் பகுத்துணர்ந்து பார்க்கும் போதுமான அறிவு முதிர்ச்சியும் மனப்பக்குவமும் பெற்றிருக்கும் காலம் தான் என்பதை குர்ஆன் தெளிவு படுத்துகிறது.
பிள்ளைப்பருவம் முடித்து குமரப்பருவம் (அதாவது டீன் ஏஜ்) தொடங்கும் வயதினை குழந்தைகளின் இரண்டாம் பிறப்பு என்று குறிப்பிடுவோரும் உளவியலில் உண்டு. இந்த இரண்டாம் பிறப்பில் குழந்தைகளுக்கு நேசத்துடன் கூடிய முறையான வழிகாட்டுதலும் போதிய அரவணைப்பும் தந்து வாழ்க்கையில் எதிர்கொள்ளக் கூடிய பிரச்சினைகளையும் அவற்றிற்குத் தீர்வு காணும் உத்திகளையும் கற்றுக்கொடுக்கும் பொறுப்பு பெற்றோர்களுடையது. ஆக, டீன் ஏஜ் பருவத்தின் இறுதியில் தான் நம்மில் பலருக்கு நிதர்சனங்களைப் புரிந்துகொள்ளும் மனப்பக்குவம் உருவாகிறது.


இந்த இடத்தில் நமது மூத்த தலைமுறையினரெல்லாம் பன்னிரண்டு , பதிமூன்று வயதுகளில் மணமுடித்து ஏழெட்டு பிள்ளைகளை பெற்று நலமுடன் வாழவில்லையா என்ற கேள்வி எழலாம்.

நமது முந்தைய தலைமுறையினருக்கும் நமது தலைமுறையில் வாழ்பவா்களுக்கும் தான் எவ்வளவு மாறுபட்ட உணவுப் பழக்கம், உடலுழைப்பு, வாழ்க்கை முறைகள் காணப்படுகின்றன. நமது தாத்தா படித்த எட்டாம் வகுப்பிற்கும் நாம் படிக்கும் டிகிரிக்கும் உள்ள வித்தியாசம் போல. எட்டாம் வகுப்பு படித்த தாத்தா கிராம நிா்வாக அலுவலகத்தில் பணிரிவதும் பட்டப்படிப்பு முடித்த பேரன் வேலையின்றி திரிவதுமே நல்லதொரு உதாரணம் தான். உண்மையில் அவா்கள் அந்த காலத்தில் அவா்கள் அறிந்திருந்த பட்டறிவுகளும் பெற்றிருந்த பக்குவங்களும் ஏராளம். 

மேலும் அவர்களுக்கிருந்த உடல்வலிமையும் நம்மிடையே அறவே இல்லை. அதிகளவு தொழில்நுட்பங்கள் உடலுழைப்பு என்பதை நீக்கிவிட்டன. தற்காலத்தில் 10ம் வகுப்பு படிக்கும் தன் மகளுக்கு காபி கூட போட தெரியாது என்பதையும் சில பெற்றொர்கள் பெருமையாக மெச்சிக்கொள்ளும் நிலையை அனுதினமும் காண முடிகிறது. 15 வயது வரை தேநீ்ர் கூட தயாரிக்க கற்றுக்கொள்ளாமல் வளர்ந்துவிட்டவள் அடுத்தாண்டு முதல் மணமுடித்து கொடுக்கப்படும் இல்லறம் இனிமையாக அமையுமா என்பது கேள்விக்குறியே. 

பிள்ளைகளுக்குப் பொறுமையயும் நிதானத்தையும் கற்றுக்கொடுக்கத் தவறுகிறோம். இக்காலங்களில் பிள்ளைகள் அவர்கள் கல்வியில் நல்ல மதிப்பெண்கள் எடுக்க வேண்டும் என்பதை மட்டுமே முதல் கடமையாகக் கொள்கின்றனர். அதற்குப் பெற்றோரரும் பள்ளிக்கூடங்களும் அளிக்கும் மன உளைச்சல்களும் அதிகம். பள்ளியில் மதிப்பெண் தவிர வேறெதுவுமே அறியாத இப்பிள்ளைகளுக்கு திடீரென திருமணம் எனும் மிகப்பெரும் பொறுப்பைச் சுமத்துவது எப்படி நியாயமாகும்? மதிப்பெண்கள் மட்டுமே நிம்மதியான வாழ்க்கையைத் தந்துவிடுமா?

பெற்றோர்களின் பாரம் குறைந்து விடவேண்டும், தினமும் வயிற்றில் நெருப்பைக் கட்டிக்கொண்டிருப்பதை போல இருக்கிறது என்பதற்காகவும் நல்ல சம்பந்தம் தேடி வருகிறது நம் பிள்ளைக்கு நல்ல வாழ்க்கையை ஏற்படுத்தித் தர வேண்டும் எனும் அவசரத்தால் பெரும்பாலும் இளவயது திருமணங்கள் நடந்தேறி வருகின்றன. 

நமது மகளுக்கு நல்ல வாழ்க்கையை அமைத்து தருவதென்றால் என்ன? நல்ல கணவன் கிடைத்து விட்டால் எல்லாம் பூர்த்தி ஆகிவிடுமா? நமது பிள்ளை அந்த வாழ்க்கைக்கு உடலாலும் உள்ளத்தாலும் தகுதியுடையவளாக இருக்க வேண்டாமா?

மனைவி என்ற ஸ்தானத்திலிருந்து அவள் ஆற்ற வேண்டிய பணிகளும் கடமைகளும் ஏராளம், நமது குடும்பம், கணவா், பிள்ளைகள் , கணவரைப் பெற்றவா்கள் என்று அனைவரையும் கவனித்துக்கொள்வதும் அன்பு செலுத்தி பணிவிடைகள் புாிவதும் ஒரு இல்லத்தரசியின் பொறுப்பல்லவா? ஆனால், இவற்றையெல்லாம் கற்றுக்கொடுக்காததன் விளைவே இன்றைய பெருகிவரும் விவாகரத்துகளின் மூல காரணம். 

கொஞ்சம் கற்பனை செய்து பாருங்கள் ஒரு சந்தர்ப்பத்தில் கணவன் உடல்நலக்குறைவினாலோ அல்லது வேறு சில காரணங்களாலோ உழைத்துதர முடியாத நிலைக்கு தள்ளப்படால் இச்சிறு பெண்ணின் நிலை என்ன? அதிக பட்சம் அவள் பெற்றெடுத்த பிள்ளைகளின் வாழ்வாதராங்களைப் பேணிட அவளுக்கு ஒரளவுக்கேணும் கல்வி அல்லது கைத்தொழில் தேவைப்படுமல்லவா? 

குடும்பத்தில் ஏற்படும் பிரச்சினைகளை லாவமாக இல்லாவிட்டாலும் அதற்கான மூலகாரணத்தையும் தீர்வுகளையும் புரிந்து கொள்ளும் பக்குவமாவது அவர்களுக்கு உள்ளதா என்பதைப் பெற்றோராகிய நாம் நன்கு அறிவோம். வீட்டுப் பிரச்சினைகளை யாரிடம் கொண்டு செல்வது/யாரிடம் கூறக்கூடாது என்பது கூட இக்காலத்துப் பிள்ளைகளுக்குத் தெரிவதில்லை என்பதே உண்மை. வாழ்வாதாரங்களைப் பெருக்கிக்கொள்ள வேண்டுமானால் ஏட்டுக்கல்வி உதவலாம். அமைதியான வாழ்க்கைக்கான விதையை நாம்தான் அவர்கள் மனதில் விதைக்க வேண்டும்.

பள்ளிக்கூடம் செல்லும் வரை சிறு பிள்ளையை போல பாவிக்கப்பட்டவள் அடுத்தாண்டில் ஒரு குடும்பதலைவியாகிறாள் எனில் அப்பெண்ணுக்குத் தனது பிரச்சினைகளை எதிர்க்கொண்டு சமாளிக்கும் திறனும் மார்க்க அறிவுடன் கண்ணியமும் ஒழுக்கமும் கற்பித்து உறவுகளைப் பேணி அனுசரித்து போகவும் தமது குடும்பத்தை எந்நிலையிலும் தூக்கி நிறுத்தும் திறனும் வழங்கப்படவேண்டியது பெற்றவா்களின் தலையாய கடமையே.



திருமணமென்பது பொதுவாக பெற்றோர்களின் ஏற்பாட்டிலும் குடும்ப சூழ்நிலை, மற்றும் வாழ்வியல் முறைகளின் படி முடிவு செய்யப்படுகிறது. எனினும் அந்த வாழ்க்கையை நல்ல முறையில் கொண்டு செல்வதற்குக் குறைந்த பட்ச கல்வியறிவும் கைத்தொழிலும் மன ஆளுமைகளும் அவசியமென்பது மறுக்க முடியாத ஒன்று. முதிர்வு அடையாத மனநிலையில் மணமுடிததுக்கொடுப்பதால் பிள்ளைகள் எதிர்கொள்ளும் வாழ்வியல் பிரச்சினை கருத்தில் கொள்ளுதல் அவசியம். சில இடங்களில் மணமுடித்து கொடுத்த மகள்களை தாய் வீட்டிலே தங்க வைத்து அவள் பெற்றெடுத்த பிள்ளைகளையும் பேணி வளர்க்கும் பெற்றோர்களைக் கூட எதார்த்தமாக காண முடிகிறது. இது மிக மிக தவறான முன்னுதாரணமாகவே அமையும். வாழ்க்கையை அனுபவிக்க விடாமல் பெற்றோரே வழிவகுக்கின்றனர். மகிழ்ச்சியின் மறுபக்கமான துயரங்கள், வலிகள், துரோகங்கள் இவற்றையும் கடந்து செல்ல பழக்கிக் கொடுப்பது அவசியமாகிறது.

உங்கள் சகோதரி
ஹசீனா அப்துல் பாசித்
read more "இளவயது திருமணம் - ஏனிந்த அவசரம்"

Monday, November 30, 2015

நாற்பதில் நாய்க் குணம்!!


நாற்பதில் நாய்க் குணம்” என்றொரு பழமொழி(!!!) உண்டு!! நாற்பது வயதில் வாழ்க்கையில் பல சவால்களை எதிர்கொள்ள வேண்டியிருப்பதால், ஒருவரின் குணநலன்களில் வரும் மாற்றங்களைக் குறிக்க இவ்வாறு கூறுவதாக நினைத்துக் கொள்கிறோம்.
ஆனால், இப்பழமொழியின் சரியான பொருள் வேறு. ஒரு நாய் தூங்கும்போதுகூட விழிப்போடு இருக்கும். மனிதர்களும், இதுவரை எப்படி இருந்தாலும், நாற்பது வயது முதல்  அதிகபட்ச விழிப்புணர்வோடு இருக்க வேண்டும் என்பதையே இப்பழமொழி வலியுறுத்துகிறது என்ற விளக்கத்தை ஒரு தளத்தில் கண்டபோது வியப்பு மேலிட்டது. உண்மைதானே!

ஆண்களுக்கு மட்டுமல்ல, பெண்களுக்கும் 40-45 வயதுக்கு மேல் உடல்நலம், குடும்பம் இரண்டிலுமே மிகப் பெரும் சவால்கள் உண்டு.



டல்நலம் என்று வரும்போது, வயதாவதின் பலவீனங்கள் - கால், கை, முதுகு வலிகள் போன்றவற்றோடு, மெனோபாஸ் பிரச்னைகளும் சேர்ந்து உடல் மற்றும் மனதை நலிவடையச் செய்யும். மெனோபாஸ் தொடங்குவதற்கான அறிகுறிகள் தெரிய ஆரம்பிக்கும். வழக்கமான ஒவ்வொரு மாதமும் பீரியட்ஸ் சமயங்களில் வரும் மனநிலை மாற்றத்தையே குடும்பத்தில் யாருமே அறிந்து, புரிந்து கொள்வதில்லை. நிறைய பெண்களுக்கே அதைக் குறித்து தெரியாது!! அப்படியிருக்கும்போது, மெனோபாஸினால் வரும் ஹார்மோன் பிரச்னைகள் எங்கே தெரிந்திருக்கும்??!!



குடும்பத்தில், சரியாக அந்த காலகட்டத்தில்தான், அவர்களின் பிள்ளைகள் டீனேஜில் அல்லது காலேஜில் இருப்பார்கள்.  டீனேஜ் காரணமாக அவர்களுக்கு ஏற்படும் ஹார்மோன் மாறுபாடுகளால் உண்டாகும் மனநிலை மாற்றத்தால், அவர்களில் சிலரும் தம் பங்குக்கு தாயை வெறுப்பேற்றுவார்கள்.
சீக்கிரமே மணமுடித்த பெண்களாயிருப்பின், அவர்களின் மகள்களுக்கும் திருமணம் முடித்து மாமியார்கள் ஆகியிருப்பார்கள். மகளின் புதுவாழ்வு சீராக இருக்கவேண்டி, மகளின் புகுந்த வீட்டார்களிடம் பணிந்து போக வேண்டிய அழுத்தத்திற்கும் ஆட்பட்டிருப்பார்கள்.
குடும்பத்தில் மாமனார்-மாமியாரும், முதுமையடைந்து, ‘இரண்டாம் குழந்தைப் பருவத்தைஎட்டிப் பிடித்திருப்பார்கள். கிட்டத்தட்ட ஒரு சிறு குழந்தையைப் போன்றே அவர்கள் மனநிலையும் மாறி விட்டிருப்பதால்அவர்களும் தம் பங்குக்கு பிடிவாதம், கோபம், அடம் பிடிக்கும் மனநிலையில் இருப்பார்கள். அவர்களுக்கென தனி சமையல், அவர்களின் உடல்நலன் பேணுதல், பராமரிப்பு என்ற கூடுதல் சுமைகளும் பெண்களின் மீதே. 

அதே காலகட்டத்தில், தம் பெற்றோரும் முதுமையை எட்டியிருப்பார்கள் என்பதால், அவர்களுக்கும் ஆதரவாக இருக்க வேண்டிய பொறுப்பும் பெண்கள் மீது உண்டு. ஆனால், மாமனார் – மாமியார் அளவுக்குப் பெற்றவர்களை உடனிருந்து கவனிக்க முடியாத நிர்பந்தங்கள் உள்ள சிலருக்கு, கூடுதல் மன அழுத்தம் ஏற்படக்கூடும்.

தவிர என்றுமே குழந்தையாக இருக்கும் கணவனையும் கவனிக்க வேண்டும். கணவனோ 40-ன் நாய்க் குணத்தைக் கடந்து “பேய்க் குணத்தின்” எல்லையான 50களில் இருப்பார். பிரஷர், ஷுகர் போன்றவை எட்டிப் பார்க்கத் தொடங்கியுள்ள அவரின் உடல்நலத்தைப் பேணும் பொறுப்போடு, உடல் தேவைகளுக்கும் ஈடு கொடுக்க வேண்டிய கட்டாயம். 

ஒருவேளை வேலை பார்க்கும் பெண் என்றால், அலுவலக வேலை, வீட்டு வேலை என்று இரண்டையும் செய்ய வேண்டிய அதிகப் பொறுப்பும், குழந்தைகள் தம் கண்காணிப்பில் தொடர்ந்து வைக்கமுடியாத காரணத்தால் ஏற்படும் குற்ற உணர்வும், அவர்கள் சரியான நட்பு வட்டத்தில் இருக்கிறார்களா என்ற படபடப்பும் உடல்-மனநலத்தைப் பாதிக்கும் சூழல்.

இப்படி, பெண்ணின் வாழ்க்கையில் டீனேஜ் ஒரு முக்கியமான கட்டம் என்றால், அதைவிட மிகக் கடினமான பருவம் நாற்பதுகள்தான். ஆங்கிலத்தில் இதை Mid-life Crisis என்பார்கள். 


ஏன் பெண்ணுக்கு மட்டும் இது கடினமான கட்டம்? 

ஒரு பெண்ணின் குடும்பச் சூழ்நிலைகள் அவள் மீது அதிக அழுத்தம் தரும் காலகட்டம் அது என்பதோடு, அவளின் உடலும் அந்த வயதில்தான் பல்வித மாற்றங்களுக்கு உள்ளாகி பாதிப்புகள் ஏற்படுத்தத் தொடங்கியிருக்கும். ஆக, எல்லா திசைகளிலும் பாதிப்புகளை அனுபவிக்க வேண்டிய இறுக்க நிலை நிலவுவது இந்த நாற்பதில்தான்!! 

உடலில் என்ன மாற்றம்?

அவர்களது உடல் “மெனோபாஸ்” என்ற நிலையின் தொடக்கக் கட்டத்தில் இருக்கிறது. அதாவது, அதுவரை சீராக வந்துகொண்டிருந்த மாதவிலக்கு, இன்னும் சில மாதங்களில் அல்லது வருடங்களில் நிறுத்தப்படுவதற்கான தயாரிப்பில் உடல் ஈடுபட்டிருப்பதுதான் மெனோபாஸின் தொடக்கநிலை. 

மாதாந்திரத் தொல்லையான மாதவிலக்கு நின்றால் நல்லதுதானே என்று தோன்றினாலும், அதன் பின்ணணியில் இருக்கும் எஸ்ட்ரோஜன் & ப்ரோஜெஸ்ட்ரோஜன் ஆகிய ஹார்மோன்கள், மாதவிலக்கு, கருத்தரித்தலோடு மட்டுமின்றி உடலின் வேறு சில  இயக்கங்களும் சீராக நடக்க இன்றியமையாதவை. ஆகையால் திடீரென அவற்றின் உற்பத்தி நிற்கும்போது, உடல், உள்ளம் என மொத்தமுமாகப் பாதிப்புகள் ஏற்படுகின்றன. 

உதாரணமாக, இரு ஹார்மோன்களும் எலும்பு தேய்மானத்தையும், இரத்தத்தின் சர்க்கரை அளவையும் கட்டுபடுத்துகிறது. இதனால்தான் வயதான பெண்கள் அதிகமாக கை, கால், மூட்டு வலியில் அவதிப்படுகிறார்கள்.  ப்ரோஜெஸ்ட்ரோஜன் சில வகை கேன்ஸர்களைத் தடுக்கிறது. மேலும், மெனோபாஸ் தொடக்க காலங்களில், மாதவிலக்கு சுழற்சியின் ஒழுங்கு  பாதிக்கப்படும். சிலருக்கு அடிக்கடி வரும். சிலருக்கு மாதக்கணக்கில் வராமல் போகும். ஒவ்வொரு முறையும் வழக்கத்தைவிட மிக அதிக இரத்த இழப்பு இருக்கும். சிலருக்கு மாதவிலக்கு சுழற்சி நிற்பதற்கு ஒன்று முதல் மூன்று ஆண்டுகள் வரை ஆகும். அதுவரை அதிக இரத்த இழப்பு என்பது உடலை மிகவும் பலவீனப்படுத்திவிடும். 

தவிர, சிறுநீர்ப் பிரச்னைகள், தூக்கமின்மை, Hot flashes எனப்படும் உடல் முழுதும் சூடு பரவும் உணர்வு, எரிச்சல், கோபம் போன்ற பல விளைவுகளும் உண்டு. ஒவ்வொருவரின் உடலின் இயல்பு பொறுத்து, விளைவுகள்  அமையும். 

ஆண்களுக்கு மெனோபாஸ் இல்லையா?

ஆண்களுக்கான ஹார்மோன் டெஸ்டோஸ்டீரான் உற்பத்தி, மூப்பு காரணமாக குறையுமே தவிர ஒரேயடியாக நிற்காது. ஆகையால் பெண்கள் அளவு கடும் பாதிப்பு இல்லை.

நாற்பது வயது என்பது ஆணுக்கும் பெண்ணுக்கும் பொறுப்புகள், கடமைகள் வகையில் ஒரே அளவிலான அழுத்தம்தான் என்றாலும், உடல் நிலை பொறுத்த வரையில் மனஅழுத்தம் பெண்களுக்கே கூடுதலாக இருக்கும் என்பதை அறிந்தோம். 

இதன் காரணமாகத்தான், இஸ்லாம் பெண்களின்மீது சம்பாதிக்கும் பொறுப்பை ஏற்றி வைக்கவில்லை. சமூகப் பொறுப்புகளும் கட்டாயப்படுத்தப்படவில்லை. பெண்களின் உடல்நிலையைக் கருத்தில் கொண்டு, அவர்களின் மென்மைதன்மையை, இந்த ஹதீஸ் விளக்குகிறது.   

பெண்களின் விஷயத்தில் (நல்ல விதமாக நடந்து கொள்ளும்படி கூறும்) என் அறிவுரையை ஏற்றுக் கொள்ளுங்கள். அவர்களை நல்லவிதமாக நடத்துங்கள். ஏனெனில், பெண் விலா எலும்பிலிருந்து படைக்கப் பட்டிருக்கிறாள். மேலும், விலா எலும்பிலேயே அதன் மேற்பகுதி மிக வளைந்ததாகும். நீ அதை (பலவந்தமாக) நேராக்க முயன்றால் உடைத்து விடுவாய். அதை அப்படியே விட்டுவிட்டால் அது வளைந்தாகவே இருக்கும். எனவே, பெண்களின் விஷயத்தில் என் அறிவுரையை ஏற்றுக் கொள்ளுங்கள். என்று அல்லாஹ்வின் தூர் (ஸல்) அவர்கள் கூறினார்கள். (அறிவிப்பாளர் - அபூ ஹுரைரா(ரலி) நூல் - புகாரி 3331)

மேலும், பெண்கள் தம் குடும்பத்தவரின் உடல்நிலையில் அதிக அக்கறை கொண்டிருந்தாலும், தமது உடல்நிலை குறித்து அதிகப் பேணுதல் இல்லாதவர்கள். அதன் காரணமாகவும் அவர்களுக்குப் பாதிப்பு அதிகமாவதற்கு வாய்ப்பு உண்டு.

எந்த உடல்நலக்குறைவுக்கும் ஆறுதல் அளிப்பதில் முதன்மை வகிப்பது உறவினர்களின் புரிந்துகொள்தல் தான். நமது குடும்பங்களிலும், தாய் அல்லது அண்ணி அல்லது அக்காக்கள் நாற்பதுகளில் இருப்பார்கள். அவர்களின் உணர்வுகளை, உடல்நிலையைப் புரிந்து கொள்ளுங்கள். சற்று அக்கறை எடுத்து, அவர்கள் உணவுப் பழக்கத்திலும் உடல்நிலையிலும் கவனம் செலுத்துகிறார்களா என்று கேட்டறிந்து ஆலோசனை கூறுங்கள். நாம் கேட்காமல் எத்தனையோ சமயங்களில் நம் தேவைகளை நிறைவேற்றியவர்களின் தேவைகளையும் நாம் புரிந்து கொண்டு நடத்தல் நம்மீதான கடமையாகும். பெண்கள் தம் தேவைகளை வெளியே சொல்ல சங்கோஜப்படுபவர்; அலட்சியப்படுத்துவர். அவர்களின் உடல்நலம் சீராக இருந்தால்தான் குடும்ப நலமும் சீராக இருக்கும். 
read more "நாற்பதில் நாய்க் குணம்!!"

Tuesday, November 17, 2015

யார் ஏமாளி?

இன்றைக்கு தொலைகாட்சியைத் திறந்தால் நாம் காண விரும்பும் நிகழ்ச்சிகளை விட அதிகம் ஆக்கிரமித்திருப்பவை விளம்பரங்கள் மட்டுமே.

சினிமா நடிகர் நடிகைகள், விளையாட்டு வீரர்கள், விளம்பர மாடல்கள் என்று அனைவரும் இந்த தொலைக்காட்சி வாயிலாக ”இதை வாங்குங்க” ”இந்த கடையில் வாங்குங்க” ”இதுக்கு இதை இலவசமாக வாங்குங்க” ”இவ்வளவு விலை குறைப்பு செய்து தருகிறோம்” ”எங்களை போல இந்த உலகத்திலும் கிடையாது” என்று டிசைன் டிசைனாக வலை விரிக்கிறார்கள். காண்பவரும் அப்படியே மதி மயங்கிவிடுவதும் மனித இயல்பு.

உண்மையிலேயே ஒருவரை ஏமாற்ற வேண்டும் என்றால் அவருடைய ஆசையை முதலில் தூண்டி விட வேண்டும். அதைத்தான் இன்றைய விளம்பரங்கள் பிரமாண்டம் என்றும் தள்ளுபடி என்றும் தூண்டில் போடுகிறார்கள்.அவர்களின் நிலையை சொல்லியும் குற்றமில்லை. வீட்டில் உட்கார்ந்த படியே இணையத்தில் அனைவரும் பொருட்களை வாங்கிவிட்டால் எதைச்சொல்லி அவர்களை கடையை நோக்கி இழுப்பது என்பதுதானே அவர்களது கவலை.

கோடிகள் பல கொடுத்து அழைத்து வருகிற சினிமா நட்சத்திரங்களுக்கான செலவும் நம் தலையில் தான் விழுகிறது என்று தெரியாத முட்டாள்கள் யாரும் இங்கே இல்லை. சிகப்பழகு தன்னம்பிக்கையைத் தருகிறது என்கிற 25 ஆண்டு கால ஃபேர் அண்ட் லவ்லி விளம்பரத்தைக் காணும் போது (ஆசிட்)திராவக வீச்சினால் முகஅழகு மாறிப்போனாலும் உள்ளத்தால் உருமாறி போகாதவர்களாய் அபாரமான தன்னம்பிக்கையுடன் டெல்லியில் உணவகம் நடத்தும் எம் சகோதரிகள் இயல்பாய் மனதில் வருகிறார்கள். அவர்களுக்கெல்லாம் இந்த ஃபேர் அண்ட் லவ்லியா தன்னம்பிக்கையினை விதைத்தது? தன்னம்பிக்கை என்பது முழுக்க முழுக்க மனம் சார்ந்தது என்று மக்கள் விளங்கிக்கொள்ளும் நாள் என்று வரும்?

ஆக்ஸ் எனும் ஸ்ப்ரேயை அடித்து கொண்டு செல்பவர் பின்னாடி பத்து பெண்கள் அவரது ஆண்மையைப் பரிசோதிக்க துரத்துகிறார்களாம். எவன் ஒருவன் பெண்ணை சக மனிஷியாய் பாவித்து நடத்துகிறானோ அவனே ஆண்மையுள்ள ஆண்மகன்.இப்படி பட்ட விளம்பரங்கள் தான் பெண்ணைப் போகப்பொருளாய்ப் பார்க்கும் வக்கிரத்தை நெஞ்சில் விதைக்கிறது. இத்தகைய விளம்பரத்தினை இயக்கியவருக்குத் தன்னம்பிக்கை சுத்தமாக இல்லை என்பதையே அவரது இந்த வக்கிரக் கருத்து கூறுகிறது.

விவசாய நிலங்கள் விலை நிலங்களாக்கப்பட்டு அதை விளம்பரப்படுத்தவும் விற்காத பெரிய ப்ராண்ட் தயாரிப்புகளை மக்களிடையே பிரபலப்படுத்தவும் இவர்கள் மெனெக்கெடுவதைப் பார்த்தால் அத்தனை வியப்பு தான் வரும். இந்த மெனெக்கெடல்களைத் தம் ஆக்கப்பூர்வமான தயாரிப்புகளுக்குச் செலவிட்டிருந்தால் அவை தானாக மக்களிடையே பிரபலமாகியிருக்குமே? இதனை மக்கள் சிந்திப்பார்களா?

விளம்பரங்களின் பாதிப்புகளில் சில


ஒரு டிவி ஷோரூமில் நின்று கொண்டிருந்தேன். அந்த தொலைக்காட்சியின் பெயரைஅதுவரை கேள்விப்பட்டதே இல்லை. இதப் பற்றி 40 வயதுக்குட்பட்ட தம்பதி விசாரித்துக் கொண்டிருந்தனர். ”சூர்யா இந்த டிவிக்கு வெளம்பரத்த்துல வரான்... அப்ப லோக்கல் டிவி லாம் இல்ல...தரமானதாகத் தான் இருக்கும். வெலயும் கம்மியா இருக்கு ..இதே வாங்கிடலாம்"என முடிவெடுத்து வாங்கினர். 

இப்படித்தான் போலியான நம்பகத்தன்மை விதைக்கப்படுகிறது. பொருள்களின் விளம்பரங்களில் வரும் நடிகர், நடிகைகளால் சில பொருட்கள் பிரபலமாகின்றன என்றால் பொருட்களின் விளம்பரத்தால் சில நடிகைகள் பிரபலமாகின்றனர். இவற்றிற்கிடையே மக்கள் ஏமாறுகின்றனர். சினிமாவில் பொய்யாக டயலாக் பேசுவதுபோல் தான் இவர்கள் விளம்பரங்களிலும் பேசுகின்றனர் என்பதை நாம் உணர வேண்டும். இத்தகைய சமூகப்பொறுப்பென்பது சிறிதும் இல்லாத இந்நடிகர்களை மானசீகக் குருவாகவும் முன்னுதாரணமாகவும் ஏற்றுக்கொள்ளும் மனப்பாங்கு விரைவில் மறைய வேண்டும்.  


என்றாலும் அத்தி பூத்தது போல ஒன்றிரண்டு விளம்பரங்கள் மனதை நெகிழச்செய்கின்றன என்பதும் மறுக்க முடியாத உண்மை. புற்று நோயை எதிர்த்து போராடும் பெண் ஒருவர் தயக்கத்தோடு இந்த உலகத்தை எதிர்கொள்ளும் போது கணவன் மற்றும் நண்பர்கள் தைரியமூட்டும் வகையில் எடுக்கப்பட்ட வாடிக்கா விளம்பரம் ஒரு மைல் கல்.நம் நாட்டின் பன்முகத்தன்மை தன்னுடைய தயாரிப்பின் இரண்டறக் கலந்த AMUL THE TASTE IF INDIA என்ற விளம்பரம் பால்ய காலம் தொட்டு என் மனதுக்கு நெருக்கமானவை.

உண்மையிலேயே மக்கள் மனதில் ஒரு பெரும் பாதிப்பை ஏற்படுத்த வேண்டிய விளம்பரங்கள் காமெடி ஆக்கப்படுகிறது என்பது தான் வேதனையளிக்கிறது. உதாரணமாக புள்ளி ராஜாவுக்கு எய்ட்ஸ் வருமா என்கிற விளம்பரம் மக்களை சென்றடைந்தாலும் அதன் நோக்கம் மக்களை சேரவில்லை .ஆணுறைகள் பயன்படுத்துவதன் மூலம் எய்ட்ஸ் போன்ற பால்வினை நோய்கள் பரவாமல்  தடுக்கலாம் .விளம்பரம் சொல்லும் கருத்து இது தான்.இது எத்தனை பேரை சென்றடைந்தது?

நுரையீரல் ஒரு பஞ்சு போன்ற உறுப்பு என்று ஆரம்பிக்கும் முகேஷ் விளம்பரம் புகைப்பிடித்தலின் கேடுகளை விளக்கும் வகையில் எடுக்கப்பட்டது. அதைக்கூட ஒரு சினிமாவில் கேலியாகத் தானே சித்தரித்தனர்?

உலகமயமாக்களின் முக்கியமான அங்கம் வகிப்பது விளம்பரங்களே என்பது மறுக்க முடியாத உண்மை. அதற்காக நீங்கள் காதில் சுத்தும் பூவை நம்புவதற்கு எல்லோரும் தயார் இல்லை என்பதற்கு அண்மையில் எடுக்கப்பட்ட 4G விளம்பரமும் அது குறித்த விழிப்புணர்வும் தக்க சான்று.

மேகியில் ஈயம் அதிகமாக உள்ளது என வெளியிடப்ப ஆய்வறிக்கையினால் பல இந்திய மாநிலங்களில் உடனடியாகத் தடையும் செய்யப்பட்டது. ஆனால், அதன் பிறகு இந்தியாவில் விற்கும் பொருளுக்கு அமெரிக்கா, மற்றும் இங்கிலாந்தில் ஆய்வு மேற்கொள்ளப்பட்டு மேகியில் ஆபத்து இல்லை என்று மீண்டும் பிரச்சாரம் செய்வது ஏன்? அப்படியெனில் இந்தியாவில் மேற்கொள்ளப்பட்ட ஆய்வுகள் தவறானவையா? இவை போன்ற வழக்குகள் மூலம் தான் மக்களுக்குத் தான் எவ்வாறு ஏமாற்றப்படுகிறோம் என்பதே புரிகிறது.

மக்களை ஏமாற்றும் இத்தகைய விளம்பரங்கள் இன்னும் வருவதையும் நம் எதிர்கால சந்ததியினரை ஏமாற்றுவதையும் தடுக்க வேண்டுமென்றால் மக்கள் விழிக்க வேண்டும். நடிகர், நடிகைகள் கூறுவதெல்லாம் உண்மை என்ற எண்ணத்தை உடைத்தெறிய வேண்டும். என்ன கூறினாலும் பொருட்கள் விற்பனையாகும் என்ற தயாரிப்பாளர்களின் நோக்கத்தை மக்கள் தாம் அழிக்க வேண்டும். உதாரணத்திற்கு இமாமியின் விளம்பரத்தில் நடித்த நடிகர் இரண்டே வாரங்களில் சிகப்பழகு என விளம்பரப்படுத்த, அதனை எதிர்த்து ஒரு சமூக ஆர்வலர் வழக்குத் தொடுத்து தன் வாதத்தில் வெற்றியும் பெற்றார்.

இன்னும் பிரபல கல்லூரிகளின் விளம்பரத்தில் நடித்த நடிகைகள் “விளம்பரத்தில் நடித்தது தவிர அந்நிறுவனத்திற்கும் தனக்கும் எந்த சம்பந்தமும் இல்லை” என பிறகு பின்வாங்கியதிலிருந்தாவது மக்கள் உண்மைகளைப் புரிந்து கொள்ள வேண்டும்.

உங்கள் சகோதரி
சபிதா காதர்.
read more "யார் ஏமாளி?"

Saturday, November 07, 2015

ஆண்கள் குறித்தும் கவலைகொள்வோம்!



 
கோட் அணிந்த மெஞ்ஞானபுர பள்ளி ஆசிரியைகள்
               இன்றைய நவநாகரீக உலகில் ஆண்,பெண் இருபாலாரும் முகம் சுழிக்கும் ஒரு பெரும் பிரச்சினை தான் ஆடைக் குறைப்பு. ஆடைக் குறைப்பு என்பது முஸ்லிம்களால் மட்டும் எதிர்க்கப்படுவது அன்று . பெண்களின் கண்ணியம் காக்கத் துடிக்கும் பல தரப்பு மக்களாலும் கடுமையாக எதிர்க்கப்படுகிறது.   18 வயது பூர்த்தியடையாத பள்ளி மாணவர்கள் ஆசிரியைகளை கேலி செய்வதும், கிண்டல் செய்யும் சம்பவங்களால் கல்வித்துறையே அதிர்ச்சியடைந்தது. இவ்வாறான பிரச்னைகளை முடிவுக்கு கொண்டு வருவது குறித்து அரசு தரப்பில் ஆய்வும் முயற்சியும் மேற்கொண்டு வரும் நிலையில்  தமிழகத்தில், முதன்முறையாக, திருச்செந்தூர் உடன்குடி அருகே பள்ளி ஆசிரியைகள், வெள்ளை நிற, "கோட்' அணிந்து, வகுப்பில் பாடம் நடத்த வேண்டும் என பள்ளி நிர்வாகம்  முன்மாதிரி  கட்டளை பிறப்பித்தது பல தரப்பிலிருந்தும்  ஆதரவு கிடைத்துள்ளது. ஆடைகுறைப்பு பற்றிய  விவாதம் நீயா நானாவில் நடந்தது. அதில் ஒரு சகோதரரின் பேச்சு கவனிக்கத்தக்கது. கீழே விடியோவில் பார்க்கவும்.


ஆனால் இன்றைய ஹிஜாப்கள் இந்த கோட்பாட்டில் வருகின்றதா? எனில் இல்லை என்றே பதில் சொல்லத் தோன்றுகிறது!

இன்றைய பெண்களின் ஹிஜாப் உடை எவ்வாறு உள்ளது என்று சற்று சிந்தித்தால் அவை வெறும் அழகிற்காக அணியப்படும் நவநாகரீக ஆடையாகவே உள்ளது என்பதில் ஐயம் இல்லை. இன்று அநேகப் பெண்கள் கருப்பு நிற ஹிஜாப் அணியும் பாங்கிற்கு மாறிவிட்டார்கள். ஆனால் வீதிகளில் ஹபாயா,ஹிஜாப் அணிந்து சில பெண்கள் சென்றால், ஆண்கள் தன்னாலே திரும்பிப்பார்க்கும் நிலையிலேயே அவர்கள் அணிந்துள்ள ஹிஜாப்கள் "பள பள” ஜிகினாக் கற்களாலும்,மணிகளாலும்,அலங்கார முத்துக்களாலும் கண்ணைக் கவர்ந்து காண்போரை கண்களால் பரவசப்படுத்தும் நிலையிலேயே உள்ளன. போதாக்குறைக்கு எதையெல்லாம் மறைக்கும் படி குர் ஆனும்,ஹதீசும் கட்டளை இட்டதோ அவற்றையெல்லாம் அப்பட்டமாக "ஆடை அணிந்தும் அணியாத" தோற்றத்திலேயே உடுத்துகிறார்கள்.  அங்க அளவுகள் எல்லாம் அப்பட்டமாக வெளியே தெரியும் வண்ணம்   நம் பெண்கள் ஹிஜாப் அணிந்து வீதிகளில் பவனி வருவதென்பது மறுக்க முடியாத உண்மை. பல்வேறு டிசைன்களில் பர்தாக்களை வாங்கி, அதனை உடலுக்குத் தக்கவாறு பிடித்துத் தைத்துக்கொள்வது, அணியும் ஹிஜாபின் அர்த்தத்தையே மாற்றிவிடுகிறது. ந’ஊதுபில்லாஹ்.

இன்னும்  அனார்கலி மாடல் புர்காக்கள் வந்துவிட்டது! அதில் அலங்காரமே கழுத்துப் பகுதியில் தான்!  தலைக்கணியும்   ஹிஜாப் கொண்டு அதனை மறைப்பதென்றால் மனது துளியும் இடம் தராது. ஏனெனில் அந்த புர்காவின்  பெறுமதியே மார்புப்பகுதி அலங்காரங்களில் தான் உள்ளது.     இன்னும் சில புர்க்காக்கள், அதன் துணி உடம்பில் ஒட்டி,வலுக்கிக் கொள்ளும் வகையில் flexible, elastic fabric வகை துணியில் தயாரிக்கப்படுகிறது. இவை  மேனி அழகையும் , அங்கங்களையும் இன்னும் தூக்கலாக காட்டியபடி!!  அந்தத் துணியில் ஹபாயா தான் இப்போதைய "பேஷனாம்". அதை அணியும் போது மனசாட்சியே சொல்லும் இதை அணிந்து  வீதியில் சென்றால் அத்தனை கண்களும் நம்மையே நோக்கும் என்று.  ஆனாலும்  நாகரீக மோகம் பேஷனை விட்டுத் தர இடம் கொடாது.

நம் மார்க்கம் காட்டித் தந்த ஹிஜாப் இதுவன்று. தன் கைகளையும்,முகத்தையும் தவிர அனைத்து உறுப்புகளையும்,கவர்ச்சி இல்லாமல் மறைக்கும் ஆடை தான் ஹிஜாப்,ஹபாயா ( திரை )

கடைகளில்  ஹிஜாப் என்று கேட்டால் கூட அங்கே இஸ்லாம் காட்டிய முறையில் கிடைக்காது.  நமக்கு பிடித்த தளர்வான புர்காக்களை கேட்டால் வேற்றுகிரக வாசிகளைப் போல் பார்ப்பவர்களும் உண்டு. அதெல்லாம் அந்த காலம், இப்பலாம் யாரும் அந்த மாதிரியான புர்கா வாங்குவதில்லை என ஒற்றை பதிலைச் சொல்லிவிடுகிறார்கள். அவர்களைச் சொல்லி குற்றமில்லை.பாவம் அவர்களும் என்ன தான் செய்வார்கள்? நம் பெண்கள் பல கடைகள் ஏறி,இறங்கி தேடுவது இந்த மாதிரி ஜிகினாக்களைத் தானே? அதனால் தான் அவர்களும் அதையே நீட்டுகிறார்கள். 1500 ரூபாய்க்கு குறைந்த புர்க்காக்களே இல்லை என்ற நிலைக்கு ஆளாக்கியுள்ளனர் பேஷன் விரும்பும் நம் மங்கைகள்!

இன்றெல்லாம் சாதாரண ஹபாயாக்கள் தேடுபவருக்கு அவை எளிதில் கிடைப்பதில்லை. இந்த நிலை விரைவில் மாற வேண்டும். அதற்கு முதலில் ஹிஜாபின் நோக்கங்கள் நம்மால் முழுமையாக உணரப்பட வேண்டும். இத்தகைய அலங்காரங்கள் நிறைந்த பர்தாவை அணிவதற்குப் பதிலாக, எளிமையான (முழு உடலையும் மறைக்கும்) மற்ற உடைகள் பலமடங்கு சிறந்தவை. அல்லாஹ் அழகை நேசிக்கக் கூடியவன், எப்போதும் அழுக்கான ஆடைகளே  உடுத்தி, கிழிந்தும் பார்ப்பதற்கே அருவருப்பான உடைகளுமே  அணிந்து அனைவரின் கண்ணுக்கும் மட்டமாக பெண்களை நிற்கச் சொல்ல வில்லை. அழகானதையே தேர்ந்தெடுக்கச் சொல்கிறான். அவை கண்ணியத்தையும் ஒழுக்கத்தையும் பார்த்த மாத்திரத்தில் விதைக்க வேண்டும் என்பதற்காக!  ஆடைகளில் அலங்காரங்கள் இருப்பதும் தவறல்ல! ஆனால் அவை எல்லையை மிகைக்காத வரையில் சரியானவையே!
 இஸ்லாமிய ஆண்களும் சளைத்தவர்களா என்ன???  பெண்களின் ஹிஜாப் பற்றியே மேடைகளிலும்  பிரச்சாரங்களிலும் பேசிப் பேசியே ஆண்களின் ஹிஜாப்பை மறக்கச் செய்துவிட்டனர்!  பெண்களையே குறை கூறும் ஆண்கள் தங்களின் ஹிஜாப் பேணுதல் பற்றி கவலைக்கொள்வதே இல்லை!  பெண்களுக்கு அறிவுரை சொல்லும் ஆண்கள் என்றேனும் சிந்தித்ததுண்டா சீர்கெட்டு அலையும் இளைஞர்களின் போக்கு குறித்து ????

இன்றைய காலத்தில் பார்க்கும் இடம் எல்லாம் அனாச்சாரங்கள் மலிந்துவிட்டன. கண்ணால் பார்க்கும்,காதால் கேட்கும் எந்த செய்தியிலும் "கற்பழிப்பு" என்ற சொல் வரவில்லையானால் அதிசயமே! அந்த அளவில் ஆடைக்குறைப்பு மனிதனை பாடாய்ப்படுத்துகிறது.இவற்றிற்கு மனிதன் தீர்வினைத் தேடுவானாயின் அதற்கு ஒரே வழி பெண்கள் மட்டுமல்ல  ஆண்களும் "ஹிஜாப்" பேண வேண்டும் என்ற உண்மை விளங்கும். ஆம், ஆண்களும் பெண்களுக்கீடாகத் தம் ஹிஜாப் பேண வேண்டும். அதைத் தான் சமநிலை  பேணும் இஸ்லாமிய மார்க்கம் எடுத்துரைக்கிறது. ஒரு கை தட்டலில் ஓசை வராது என்ற கோட்பாட்டினை இஸ்லாம் கொண்டுள்ளது. சமுதாய மாற்றம் என்பது ஆண்களாலும் பெண்களாலும் தான்  கொண்டு வர முடியும் என்பதனை வலியுறுத்துகிறது. அதனால் தான் ஆண்களுக்கும் ஹிஜாப் என்பதனை கட்டாயமாக்கியது. ஹிஜாப் என்பது உடை சம்மந்தப்பட்ட விஷயம் மட்டும் அல்ல!

"ஹிஜாப்" என்றால் என்ன?? ஹிஜாப் என்பது திரை. தன்னை, தன் கற்பை பார்வையாலும், ஆடையாலும் காத்துக்கொள்ள இஸ்லாம் காட்டித் தந்த சிறந்த வழி முறை தான் ஹிஜாப். ஆண், பெண் இருபாலருக்குமான மனரீதியான ஹிஜாபிற்கு வித்தியாசமில்லையென்றாலும் உடையளவில் மட்டும் சற்று வேறுபாடு உண்டு. பெண்களுக்கு எந்த அளவு ஹிஜாப் வலியுறுத்தப்படுகிறதோ, ஆண்களுக்கும் அவ்வலியுறுத்தல் சற்றும் குறைவில்லாதது.

காலைப்பொழுதும் மாலைப்பொழுதும்  பார்க்கில்  நடமாடவோ, வாக்கிங் செல்லவோ  அவ்வளவு அசவுகரியம் .  உடல் முழுதும் மூடிக்கொண்டு ஓட்டப்பந்தயங்களில் ஓட முடியாதா, டென்னீஸ் விளையாட முடியாதா என கேட்பவர்களுக்கும் இதே கேள்வியைத்தான் முன் வைக்கிறோம். ஏன் முழு உடை அணிந்து ஆண்களால் ஜாக்கிங் செல்ல முடியாதா? விளையாட முடியாதா?  சஹாபாக்களிலேயே அதிகம் வெட்கப்படுபவரான உஸ்மான் ரழி அவர்களைக் கண்டதும் தமது உடையை ஒழுங்குபடுத்தினார்கள் நம் நபி (ஸல்). வெட்கம் ஈமானின் ஓர் அங்கம் என்பதை நாம் அறியவில்லையா? பல தவறுகள் மட்டுமின்றி, அரைகுறை ஆடையணிவதும் ஒரு தவறு தான். அத்தவறைச் செய்யவும் வெட்கப்பட வேண்டும்.  பெண்களின் ஆடை குறித்து கவலைக்கொள்ளும் ஆண்கள் சிக்ஸ் பேக் தெரியும்  வண்ணம் இறுக்கி தன் உடலை காண்பிக்கும்  சட்டைகள் அணிவது யாரை கவர்வதற்காக ?????     உள்ளாடைகளும்    தெரியும் வண்ணம்,  தரையோடும் இழுத்துச் செல்லப்படும் கால்சட்டைகளையும் அணிவதை இன்று பல முகச்சுளிப்புகளுடன் பெண்கள்  கடந்து விடுகிறோம். இவர்களெல்லாம் திருந்தப்போவது எப்போது ?

தாம் அணிந்திருக்கும் அழகிய உடைகளைப் பிறர் காண வேண்டும் என்று பெருமையுடன் நடக்கும் சகோதரர்களே, சகோதரிகளே, கீழ்வரும் ஹதீஸை மனதில் நிறுத்திக்கொள்வோம். இறைவன் நம் அனைவரையும் பாதுகாப்பானாக.

4240. நபி (ஸல்) அவர்கள் கூறியதாவது:
(முற்காலத்தில்) ஒரு மனிதன் தோள்கள் வரை தொங்கும் தனது தலை முடியையும் தான் அணிந்திருந்த இரு ஆடைகளையும் எண்ணிப் பெருமிதத்தோடு நடந்து சென்று கொண்டிருந்தான். அப்போது பூமிக்குள் அவன் புதையுண்டு போனான். அவன் மறுமை நாள் நிகழும்வரை பூமிக்குள் குலுங்கியபடி அழுந்திச் சென்றுகொண்டே இருப்பான்.
இதை அபூஹுரைரா (ரலி) அவர்கள் அறிவிக்கிறார்கள்.
- மேற்கண்ட ஹதீஸ் அபூஹுரைரா (ரலி) அவர்களிடமிருந்தே மேலும் மூன்று அறிவிப்பாளர்தொடர்கள் வழியாகவும் வந்துள்ளது.
Book : 37
ஆடையொழுக்கமும்,. கட்டுப்பாட்டுடன் ஒழுக்கமும் இருபாலினரும் கடைபிடிக்கும் போது தான் சமுதாயத்தில் நிகழும் கலாச்சார சீரழிவுகளுக்கு முற்றுபுள்ளி வைக்க முடியும். இன்ஷா அல்லாஹ் இனி ஹிஜாப் பற்றி பேசுகையில் ஆண்களுக்கும் பெண்களுக்கும் சேர்த்தே உரைப்போம்!  வளமான சமுதாயத்தினை அமைத்திட இருதரப்பினரையும்  உருவாக்க முயற்சிப்போம் இன்ஷா அல்லாஹ்...

உங்கள் சகோதரி,
உம்மு ஜாக்கி, இலங்கை

read more " ஆண்கள் குறித்தும் கவலைகொள்வோம்!"

Saturday, October 31, 2015

வாடகைத்தாய் - வரமா? சாபமா? : ஃபாலோ-அப்


வாடகைத்தாய் முறையில் வாடகைத்தாய்க்கும் பிறக்கும் குழந்தைக்கும் நேரும் அபாயங்கள் குறித்து விரிவாகக் கடந்த பதிவில் வெளியானது.

உலகளவில் வாடகைத்தாய் மையமாகக் கருதப்படும் இந்தியாவில் வெளிநாட்டு வாடிக்கையாளர்கள் மூலம் கோடிக்கணக்கில் பண வர்த்தகம் நடைபெற்று வந்தது. இந்தியாவின் நவீன மருத்துவ முன்னேற்றம் மற்றும் குறைந்த விலையால் வெளிநாட்டவர் பலர் இந்தியாவை நாடி வருவதால் லட்சங்களுக்காக விதிமுறைகள் கட்டுப்படுத்த இயலா அளவில் மீறப்பட்டும் வந்தன. 

தரகர்களாலும் மருத்துவமனைகளாலும் வாடகைத்தாய்களால் லட்சங்கள் சம்பாதித்தாலும் உடலையும் உயிரையும் வருத்தி குழந்தை பெறும் வாடகைத்தாய் அதில் பொறியளவு வருமானம் பெற்று ஏமாறுகின்றனர். இச்சூழ்நிலையில், இத்தகைய அநீதிகளையெல்லாம் கண்டு வருந்திய மனிதாபமானமிக்க ஒருவர் தொடுத்த வழக்கால் சமீபத்தில் இந்திய அரசு மிக முக்கியமான ஒரு தடையுத்தரவு பிறப்பித்துள்ளது.


”வெளிநாட்டவர் இனி இந்திய வாடகைத்தாய்களை நாடி பயன் பெற இயலாது.” இது மிக மிக வரவேற்கத்தக்க சட்ட நடவடிக்கையாகும்.


ஐரோப்பியாவின் பல நாடுகளில் இந்த வாடகைத்தாய் முறை முற்றிலும் தடை செய்யப்பட்டுள்ளது போல், இந்தியாவிலும் விரைவில் முழுமையாகத் தடை செய்யப்பட வேண்டும். உணர்வுகள் பணத்துடன் போட்டியிட்டு தோற்றுவிடும் முன் இந்திய அரசு விழித்துக்கொள்ள வேண்டும். இந்தியாவின் மருத்துவ முன்னேற்றங்கள் இந்தியாவிற்கும் இந்திய மக்கள் அனைவருக்கும் நன்மையே பெற்றுத்தருவதாக இருக்க வேண்டும்.

http://www.bbc.com/
read more "வாடகைத்தாய் - வரமா? சாபமா? : ஃபாலோ-அப்"

Thursday, October 22, 2015

வாடகைத்தாய் - வரமா? சாபமா?

பிஸ்மில்லாஹ்
குழந்தை பெற்றுக்கொள்ள உடலால் இயலாதவர்கள் ஒரு காலத்தில் பலரது ஏளனப்பார்வைக்கு ஆளாகிவந்த காலம் இன்று மலையேறிவிட்டது. பல்வேறு உடல் பிரச்சினைகளுக்குத் தீர்வு காணப்பட்டு பலருக்குத் தாய்மையினை வழங்கியுள்ளது இன்றைய மருத்துவத்துறையின் நவீன கண்டுபிடிப்புகள். இந்த மருத்துவங்கள் பெண்களுக்கு இழைக்கும் பக்கவிளைவுகளை யாரும் கணக்கில் கொள்வதில்லை. பெண்கள் தாம் சுமைதாங்கிகளாகிவிட்டனரே. குழந்தையின்மையினை சமூகம் அந்த அளவிற்கு மக்கள் மனதில் பாறை போன்ற பாரத்தை விதைத்துவிட்டதே இதற்குக் காரணம்.
அத்தகைய மருத்துவத்தில் ஒன்றுதான் வாடகைத்தாய். சிலருக்குக் கர்ப்பகாலம் என்பதே உயிருக்கு ஆபத்தாக இருக்கக்கூடும் என்ற நிலையையும் இன்று வாடகைத்தாய் எனும் திட்டத்தின் மூலம் “பெற்றோர்” ஆகும் வாய்ப்பை அடைந்தனர். இங்கு வேடிக்கை என்னவென்றால், யாருக்கு மருத்துவம் தேவைப்படுகிறதோ அவரை விட்டுவிட்டு அவரைக் குணப்படுத்துவதற்காக, வேறொருவருக்கு மருத்துவம் வழங்கப்படுகிறது.
வாடகைத்தாய் முறைக்கு இந்தியாவில் 2002ல் அனுமதியளிக்கப்பட்டு பலரும் குழந்தை வரம் பெற்று வருகின்றனர். குழந்தைப்பேறு பெற இயலா இந்தியர்கள் மட்டுமின்றி அந்நிய நாட்டவர்களும் இந்தியப்பெண்களையே வாடகைத்தாய் வரம் கொடுக்க நாடுகின்றனர். காரணம், அவர்கள் நாட்டைவிட, இந்தியாவில் அவர்கள் குழந்தைக்கான விலைமதிப்பு குறைவு என்பதே.
வாடகைத்தாய் முறையில் பல வகைகள் உள்ளன. வாடகைத்தாயாக இருப்பவரின் கருவும் சில சமயங்களில் கருமுட்டைக்காக எடுத்துக்கொள்ளப்படுகிறது. இந்த சமயங்களில் தான் குழந்தையின் உண்மையான தாய் யாரென்பதில் குழப்பங்களும் கலவரங்களும் இலகுவாக உருவாகின்றன. இன்னும் சில வகைகளில் தந்தையாக ஊர் பெயர் தெரியாத யாரோ ஒருவர் பங்கெடுக்கிறார். சில வகைகளில் மட்டுமே வளர்ப்புப்பெற்றோரே மரபணு பெற்றோராகவும் இருக்கின்றனர்.
விஞ்ஞான வளர்ச்சியாகினும் தொழில்நுட்ப வளர்ச்சியாகினும் அவற்றுள் காணப்படும் நன்மைகளைக் கண்டவுடன் தீமைகளைக் கண்டுகொள்ளாமல் அந்தரத்தில் தொங்கவிடுவது நிச்சயம் எதிர்காலத்தில் பலப்புது பிரச்சினைகளுக்கு வழிவகுக்கும். அவ்வளர்ச்சிகள் தரும் புதுமைகளை, அவற்றை அப்படியே ஏற்றுக்கொள்வதால் உலகிற்கும் வருங்கால தலைமுறையினருக்கும் கேடு தான் விளையும்.
அந்த வகையில் விஞ்ஞானத்தின் அசுர கண்டுபிடிப்பான வாடகைத்தாய் முறையினையும் அனைத்துத்தரப்பினரின் நியாயங்களையும் கணக்கில் கொண்டு நோக்க வேண்டும். இஸ்லாம் கூறுவதும் இதுவே.
ஒரு கண் பிடுங்கப்பட்ட நிலையில் ஒருவன் வந்து நியாயம் கேட்டாலும் எதிராளி வரும் வரை தீர்ப்பை தாமதிக்க வேண்டும்.. ஒரு வேளை, எதிராளிக்கு இரண்டு கண்களும் பிடுங்கப்பட்டுருக்கலாம் என்பது நபிமொழி.

வாடகைத்தாய் முறையில் கையாளப்படும் அநீதிகள்:


  • வழக்கம்போல், இங்கும் பணம்படைத்தவர்களின் வருத்தங்களே பெரிதாகப் பார்க்கப்படுகின்றன. குழந்தை பெற்றுத்தரும் அந்த பெண்ணின் கர்ப்பகால மனநிலையோ பிரசவத்திற்குப் பிறகான அவரது உடல்,மன உளைச்சல்களோ சிறிதும் கவனத்தில் கொள்ளப்படுவதில்லை. கர்ப்பகாலம் முழுவதும் தம் குடும்பம், குழந்தைகளைப் பிரிந்து தனிமைச்சிறையில் வைத்து ஊட்டச்சத்து உணவுகள் கொடுத்து பராமரிக்கப்படுகிறார்கள். அந்த சமயத்தில் அவரது சொந்த குழந்தைகள் தம் தாயைப் பிரிந்து வாடுகின்றனர். யாருக்கோ குழந்தை பெற்றுக்கொடுக்க, தம் குழந்தைகளைத் திடீரென்று பத்து மாதங்கள் பிரிந்து வாழும் அநீதி சர்வசாதாரணமாக நிகழ்கிறது.
  • பல சந்தர்ப்பங்களில் சுமந்து, பெற்றவள் உண்மையான தாயா அல்லது வளார்ப்பவளா என்றும் வழக்குகள் நடந்த கதைகளும் உண்டு. இன்னும் ஒரு படி மேலே போய், ஒரு தெற்காசிய நாட்டில் நடந்தததோ இன்னும் அதிகம். ஒரு அந்நிய நாட்டு தம்பதியருக்கு வாடகைத்தாய் பெற்றெடுத்த இரட்டைக்குழந்தைகளில் ஒன்று குறைபாட்டோடு பிறக்க, பூரண சுகத்துடன் இருந்த ஒரு குழந்தையை மட்டும் எடுத்துச்சென்றுவிட்டனர். இன்று குறைபாடுள்ள குழந்தையுடன் வாடகைத்தாய் வாழும் சூழல். ஏனென்று கேட்பாரில்லை.
  • குழந்தை உருவாக்கப்படுதலில் உள்ள பல விஷயங்கள் வாடகைத்தாய்க்குத் தெரிவிக்கப்படுவதில்லை. பிரசவத்தின் போது வாடகைத்தாய் உயிரிழந்தால் என்ன இழப்பீடு, அவர் குடும்பம், குழந்தைகளின் எதிர்காலம் என்று எதுவும் சட்டங்கள் முறையாகப் பின்பற்றப்படுவதுமில்லை. அவ்வாறு பிரசவத்திற்குப் பிறகு இறந்துவிட்ட பிரமீளா எனும் பெண்ணின் மரணத்தை ஒரு விபத்து என்று கோப்பு மூடப்பட்டும்விட்ட பயங்கரங்களும் நடந்துள்ளன.
  • வாடகைத்தாய் முறைக்கென பல சட்டங்கள் முறையாகக் கண்டிப்புடன் வகுக்கப்பட்டிருந்தாலும் அவற்றை மீறுதலும் மிக எளிதாகவே நடைபெறுகின்றன. உதாரணத்திற்கு, வாடகைத்தாயாக இருக்கவேண்டியவர், ஏற்கனவே குழந்தை பெற்றிருந்தால், சட்டப்படி அடுத்த இரு வருடங்களுக்குப் பிறகே அவர் வாடகைத்தாயாக முடியும். ஆனால், பணத்தேவையும் குழந்தைதேவையும் இரு தரப்பினருக்கும் பொறுமையை வழங்குவதில்லை. மேற்கண்ட இந்த விதிமுறை எளிதில் மீறப்படுகிறது. முன்னுரிமை, கவனம், அக்கறை எல்லாம் பணம் கொடுப்பவர்களுக்கே வழங்கப்படுகின்றன. மேலும், கர்ப்பகாலத்தின்போதும் பிரசவத்தின் போதும் உடலில் நிகழும் சில மாற்றங்கள் வாழ்நாள் முழுதும் தொடரக்கூடியவை. ஆயுள் முழுதும் தொடரும் இப்பிரச்சினைகளுக்கு யாரும் பொறுப்பேற்பதில்லை. வாடகைத்தாயின் உடல்நிலையைப் பற்றி கவனத்தில் கொள்ளாததற்கு இந்த உதாரணமே போதுமானது. வெகுசிலர், அரிதிலும் அரிதாக, குழந்தைப்பேற்றுக்குப் பிறகும் வாடகைத்தாயின் குடும்பத்தினருக்குப் பணம்/பொருள் உதவி செய்கின்றனர்.

வாடகைத்தாய்மார்கள் தம் வாடகைக்கர்ப்பகாலத்தில்

வாடகைத்தாய் முறையை ஆதரிப்பவர்களுக்கு ஒரே ஒரு கேள்வி:

பத்து மாதங்கள் சுமந்து பெற்றால் தான் தன் பிள்ளையாக முடியும். ஒரு குழந்தைக்கு ஒரு தாயும் ஒரு தந்தையும் மட்டுமே பெற்றோராக முடியும். இவ்வாறிருக்கையில், தன் கருமுட்டையினை மட்டும் வழங்கினால் தாய் அந்தஸ்தைப் பெறமுடியும் என்றால் பத்து மாதங்கள் சுகமான சுமையாகச் சுமந்து, சொல்லொணா துயருடனும் வலியுடனும் அக்குழந்தையைப் பெற்றெடுப்பவளுக்கு அதை விடவும் அதிக உரிமையும் தாயாகும் தகுதியும் உருவாகிறது. எனில், அக்குழந்தையின் தாய் யார்? கருத்தாய், கருவைச் சுமந்து, உயிரைப் பணயம் வைத்து மறு ஜென்மம் எடுத்து பெற்றெடுப்பவளா? கருமுட்டையையும் பணத்தைக் கொடுத்துப் பிள்ளையை வாங்கியவளா? (அமெரிக்காவில் 1987ல் இது போன்ற வழக்கு ஒன்று போடப்பட்டதும் வரலாறு)
இவ்வனைத்து பிரச்சினைகளுக்கும் குர் ஆன் எளிதாக விடையளிக்கிறது.
58:2 இவர்களைப் பெற்றெடுத்தவர்கள் தாம் இவர்களுடைய தாய்கள் ஆவார்கள்
42:49. அல்லாஹ்வுக்கே வானங்களுடையவும் பூமியுடையவும் ஆட்சி சொந்தமாகும்; ஆகவே தான் விரும்பியவற்றை அவன் படைக்கின்றான்; தான் விரும்புவோருக்குப் பெண் மக்களை அளிக்கிறான்; மற்றும் தான் விரும்புவோருக்கு ஆண் மக்களை அளிக்கின்றான்.
42:50. அல்லது அவர்களுக்கு அவன் ஆண்மக்களையும், பெண் மக்களையும் சேர்த்துக் கொடுக்கின்றான்; அன்றியும் தான் விரும்பியோரை மலடாகவும் செய்கிறான் - நிச்சயமாக, அவன் மிக அறிந்தவன்; பேராற்றலுடையவன்.
இறைவன் தனக்கு விதித்திருப்பதை ஏற்றுக்கொள்ளாமல் விதியினை மாற்றியமைப்பதென்பது அவனது படைப்பாற்றலை ஏற்க மறுத்து அவனது ஆற்றலை கையில் எடுப்பதற்கு ஈடாகும். தன் கணவரல்லாதவரின் விந்தணுவை ஒரு பெண்ணின் உடலில் செலுத்தப்படுவதை இஸ்லாம் கடுமையாகக் கண்டிக்கிறது. அதனையே விபச்சாரம் என்றும் கூறுகிறது. 

பிறக்கும் குழந்தைக்கு நிகழும் அநீதிகள்:

1. இங்கு மரபணு பெற்றோரில் யாரேனும் ஒருவர் தமது விந்தணுவையோ கருமுட்டையையோ வழங்கினால் போதுமாதாக உள்ள சூழ்நிலையில், ஓரினச்சேர்க்கையில் ஈடுபடுவோர் தமது கருமுட்டையையோ/விந்தணுவையோ மட்டும் தானமாக வழங்கி எளிதில் பெற்றோராகி விடுகின்றனர். பிறக்கும் அக்குழந்தையோ, அவ்வோரினச்சேர்க்கை தாய்களுடனோ அல்லது தந்தைகளுடனோ மட்டும் வளரும் விபரீதத்திற்கு ஆளாகி, அதன் எதிர்காலம் இருளில் செல்கிறது.
2. வாடகைத்தாய் முறையில் விரல்விட்டு எண்ணிவிடக்கூடியவர்களைத் தவிர, 99% சதவிகித குழந்தைகளுக்குத் தாய்ப்பால் மறுக்கப்படுகிறது. குழந்தைக்குத் தாய்ப்பாலின் அவசியம் அறியாத ஒருவரால் எவ்வாறு ஒரு தாயாக இருக்க முடியும்? வாடகைத்தாய்க்குப் பலவித ஊசிகள் மூலம் பால் சுரப்பது தடைசெய்யப்படுகிறது. பிறந்த அக்குழந்தைக்கோ செயற்கை உணவுகள் ஊட்டப்படுகிறது. குழந்தை அருந்த வேண்டிய தாய்ப்பாலைத் தடுப்பதுதான் இன்றைய விஞ்ஞானம் கண்டுகொண்ட முன்னேற்றமா? இது நிச்சயமாக எதிர்கால சந்ததியினரின் நலனில் சிறிதும் அக்கறை கொள்ளாத பண முதலைகளின் கண்டுபிடிப்பல்லவா?
3. குழந்தையின் வளர்ச்சியில் கர்ப்பகாலம் மிகப்பெரும் பங்கு வகிப்பதை நாம் அனைவரும் நன்கு அறிவோம். அதனால் தான் கர்ப்பகாலத்தில் மிக மிக அதிகமாகக் கவனிப்பு கர்ப்பிணிகளுக்கு வழங்கப்படுகிறது. அவர்களது மன, உடல் ஆரோக்கியம் நுண்ணிய அளவில் கண்காணிக்கப்படுகிறது. பணத்திற்காகக் குழந்தையைச் சுமக்கப்படும் ஒரு தாயால் எப்படி அக்குழந்தைக்கு நல்ல மன நலத்தை விதைக்க முடியும்?
4. இன்னும் சில சந்தர்ப்பங்களில் பெற்ற தாயின் தாய்ப்பாலைக் குழந்தைக்குத் தடுத்துவிட்டு, யாரோ ஒருவர் தாய்ப்பால் வங்கிக்குத் தானமாக வழங்கிய தாய்ப்பாலைக் குழந்தைக்கு வழங்கும் அவலமும் நிகழ்கிறது. தாய்ப்பால் வங்கிக்கும் தடாவா என அதிரும் உங்களில் எத்தனை பேர், தாய்ப்பால் வங்கியில் பெறப்படும் பாலில் பாக்டீரியா உற்பத்தி அதிகமாக இருப்பதை அறிவீர்கள்?
5. ஒரே தாயிடம் தாய்ப்பால் அருந்திய அத்தனை குழந்தைகளும் பால்குடி சகோதரர், சகோதரிகள் ஆகிவிடுகின்றனர். பால்குடி சகோதர சகோதரிகளுக்குள் திருமண பந்தம் ஏற்படுவதை இஸ்லாம் ஹராமாக்கியுள்ளது. அறிவுடையோர், பால்குடி சகோதரர்களுக்குள் திருமண பந்தம் ஏற்படுவதை வெறுப்பர். இவ்வாறு அறியாமல் திருமணம் செய்துகொண்ட தம்பதியினர் பலர், தம் திருமணத்திற்குப் பின் தாம் இருவரும் பால்குடி சகோதர,சகோதரி என்பதை அறிந்து பேரதிர்ச்சிக்கு ஆளாகியுள்ளனர். ஆக, பால்குடி தாய் / வாடகைத்தாய் யார் என்பதை அறியாதிருந்தால் அது இன்னும் பலப்பல சிக்கல்களை உருவாக்குகிறது.
6. இந்தியாவில் வாடகைத்தாய் மருத்துவத்தின் தலைநகரமாக விளங்கும் குஜராத், ஆனந்த் நகரத்தின் புகழ்பெற்ற அகான்ஷா மருத்துவமனையின் உரிமையாளரும் மருத்துவருமான நயானா பட்டேல் முதல் வாடகைத்தாய் குழந்தையை உருவாக்கினார். அக்குழந்தையின் வாடகைத்தாயாக இருந்தவர் யார் தெரியுமா? குழந்தையின் மரபணுத்தாயின் தாய். அதாவது தன் பாட்டிக்குப் பிரசவமானது. ஆரம்பமே இத்தனை சிக்கல்களைக்கொண்ட மருத்துவம் தான் இந்த வாடகைத்தாய் முறை. குழந்தைபேறில்லா தம்பதியினருக்கு ஒரு குழந்தை மற்றும் பணம் கொழிக்கும் மருத்துவத்துறை - இவ்விரண்டைத் தவிர அனைத்துமே கேள்விகளும் குழப்பங்களும் நிறைந்ததுதான் வாடகைத்தாய் முறை.
7. இன்னும் சிலர் அறிவுப்பூர்வமாக வாதாடுவதாக எண்ணி, வாடகைத்தாயையும் செவிலித்தாயயும் ஒப்பிடுகின்றனர். செவிலித்தாய் பாலுட்டும் குழந்தையின் பெற்றோர் யாரென்று குழப்பம் இருப்பதில்லை. இங்கு பால்குடி தாயும் சகோதரர்களும் மட்டுமே கணக்கில் கொள்ளப்பட வேண்டும். ஆனால் வாடகைத்தாய் முறையில் அடித்தளமே பதிலற்ற கேள்வியாகவே வாழ்க்கை முழுவதும் கழிகிறது.
கர்ப்பப்பை என்பது ஒரு பெண்ணின் மானசீகமானதும், எல்லா உணர்வுகளுக்கும் மேலான தாய்மை உணர்வைத் தருவதுமான ஓர் அந்தரங்கம். உணர்ச்சிகளைக் கொன்று புதைக்கும் பணவர்த்தகத்தில் இந்த தாய்மையும் கர்ப்பப்பையும் விலை போவது மிக மிக வருத்தத்திற்குரியதாகும். இன்று ஆபத்பாந்தவனாகத் தோன்றும் இந்த வாடகைத்தாய் முறையில், வரும்காலத்தில் பிள்ளை பெற்றுக்கொள்வது உடலழகைப் போக்கிவிடும் என்று எண்ணும் பெண்களும் பணத்தை விட்டெறிந்து பிள்ளைகளை “பெற்றுக் கொள்ளும் ஆபத்தாக” மாறிவிடும். பணமிருந்தால் நியாயத்தைத் தன் பக்கம் ஆக்கிக்கொள்ளலாம் என்பவர்களுக்கும் இன்றைய போலி அரசியல்வாதிகளுக்கும் பெரிய வித்தியாசமிருப்பதாகத் தெரியவில்லை. ஆட்டைக் கடித்து மாட்டைக் கடித்து இன்று மனிதனின் ரத்தத்தைக் குடிக்கும் தொழில்நுட்ப வளர்ச்சிதான் இது. இன்று தவிர்க்கவில்லையெனில் நாளை தடுக்கமுடியாது.
குழந்தையைத் தானே சுமந்து தானே பெற்ற ஒருவரால் வாடகைத்தாய் முறையை எளிதில் குறைகூறிவிட்டு நகர்ந்து விடலாம் என்று எண்ணுபவர்களுக்கும்,யாரோ ஒருவரின் கருமுட்டையையும் விந்தணுவையும் சேர்த்து உருவாக்கி, வாடகைத்தாயின் கர்ப்பப்பையில் வைத்துப்பெற்றெடுத்து வளர்ப்பவர்களுக்கும், ஒன்றே ஒன்றை மட்டும் கூறிக்கொள்கிறேன். வாடகைத்தாய்க்குப் பிறக்கும் குழந்தையைவிட, யாரோ ஒருவருக்குப் பிறந்து, இன்று அனாதையாக, அன்புக்கு ஏங்கித் தவிக்கும் ஒரு குழந்தையைத் தத்தெடுத்தல் பன்மடங்கு மேலானது. அந்த பாக்கியத்தை நழுவ விடாதீர்கள்.

ஃபாலோ-அப்

islamqa.info
onislamnet
beautifulislam.net
http://www.businessinsider.com/


read more "வாடகைத்தாய் - வரமா? சாபமா?"