என்ன இல்லை நம் இனிய மார்க்கத்தில்?

இஸ்லாமியப் பெண்ணே!
இஸ்லாமியப் பெண்ணே!
என்ன இல்லை நம் இனிய மார்க்கத்தில்?
எதற்கு விழுகிறாய் துன்யா மோகத்தில்?

குருவிக்கும் கூட்டுக்கும்
காட்டுக்கும் மேட்டுக்கும்
வானுக்கும் மண்ணுக்கும்
ஆணுக்கும் பெண்ணுக்கும்
அனைத்துக்கும் இறைவன்
அழகாய் வகுத்துவிட்டான்
வாழ்வியல் வழிமுறையை!



வாழ வழிவகுத்த 
வாழ்வியல் மார்க்கம்,
நேர்மையை கடைபிடிக்கும்
நெறிகொண்ட மார்க்கம்,
தூய்மையை கற்றுத்தரும் 
தூய மார்க்கம்,
அறியாமை அகற்றும் 
அரிய மார்க்கம்,
அதற்கு அஞ்சி அடிபணிந்தால்
அதுவே காட்டும் நேர்வழியென்னும்
அழகிய சொர்க்கம்!

நேர்வழி செல்வதற்க்கும்
வழிகெட்டுப்போவதற்க்கும்
வித்தியாசங்களை 
விபரித்த பின்பும்!
நன்மைக்கும் தீமைக்கும்
பகுத்தறியும் தன்மையை 
கற்பித்த பின்பும்!
கல்நெஞ்சம் கொண்டு 
கரைபடியத் துடிக்கும்
மானிடவர்க்கமாக 
மாறுவதோ பெண்மை!

எதிராளி முன்னே -பலசாலியாக
எதிர்கொண்டு போரிட முடியாத வீரன்
புறமுதுகுகாட்டி ஓடுவது போல!
இஸ்லாத்தின் நெறியில் 
இல்லாத வழியில்
இச்சைகள் கொண்டு 
இணங்குவது முறையோ?
ஈமானில் உறுதி இல்லாது போக
ஈரமற்ற நெஞ்சாய்
ஈனமாய் வாழ்வதுதான் சரியோ?

வெளியுலகை நோக்கு
வெற்றியை இலக்காக்கு-தூய
எண்ணங்களைக் கொண்டு
தோல்விகளை தூளாக்கு!
இறைக்கு அஞ்சி நட
இகழ்ச்சிக்கும் அஞ்சி நட!

விழிப்புணர்வோடு இரு!
வீண் விபரீதங்களை
விழி'புணர்வ'திலிருந்தும்
விழிப்புணர்வோடு இரு
சமூகத்தில் சத்தான விதைகளை தூவு!
வழியெங்கும் முளைக்கட்டும்
சத்திய சன்மார்க்கத்தின் பூவு..

டிஸ்கி: இக்கவிதை 12-5-2012 அன்று  முத்துப்பேட்டையில் நடைபெற்ற பெண்கள் சமூக விழிப்புணர்வு மாநாட்டில் இன்ஷியா என்ற மாணவியால் வாசிக்கப்பட்ட எனது கவிதை.

அன்புடன் மலிக்கா

இறைவா!

உன்னையே நாங்கள் உறுதியாய் வணங்குகிறோம்

உன்னிடம் மட்டுமே உதவியை கேட்கிறோம். 

                      **************************

சொல்விளக்கம்

ஈமான் - உறுதியான இறை நம்பிக்கை

துன்யா- இம்மை உலகம்

	Tweet