Monday, April 17, 2017

வலி நிவாரணி

டீக்கடை என்னும் முகநூல் குழுமம் நடத்திய அறிவியல் கட்டுரைப் போட்டிகளில் பெண்கள் எழுதிய கட்டுரை பிரத்யேக அனுமதியுடன் உங்கள் இஸ்லாமிய பெண்மணியில் வெளியிடப்படுகிறது. அனைவரும் படித்து உங்கள் அறிவியல் அறிவை வளர்த்துக் கொள்ளுங்கள்...

வலி நிவாரணி - ஆஸ்பிரின் கண்டுபிடிக்கப்பட்ட வரலாறு (இரண்டாமிடம் பெற்ற கட்டுரை) - எழுதியவர்.Nadhira Deen


நம் வாழ்வின் வழியெங்கும் வரும் விதம், விதமான வலிகளை நாம் எதிர்கொண்டே ஆக வேண்டியுள்ளது.

வலி என்பது மனிதனின் வாழ்வில் பிறப்பு முதல், இறப்பு வரை ஏதாவது ஒரு வகையில் கூடவே பயணம் செய்யும் அசவுகரியம். அடுக்கடுக்காய் தொல்லை தரும் அவஸ்தை. ஆளையே முடக்கி போடும் வல்லமை பெற்றது.

நம்மை அணு , அணுவாய் சித்திரவதை செய்யும் வலி முதல், ஆட்கொல்லி நோய்கள் வரை அல்லாஹ் அதற்குரிய நிவாரணத்தை அருளாமல் இறக்குவதில்லை.

அல்லாஹ் எந்த நோயையும் அதற்குரிய நிவாரணியை அருளாமல் இறக்குவதில்லை...என்று நபி (ஸல்) அவர்கள் கூறினார்கள். (ஸஹீஹுல் புகாரி பாகம் 7…அத்தியாயம் 71: ஹதீஸ் எண் 582)

கற்கால மனிதர்கள் வலி என்பது கடவுளின் தண்டனை என்றே நம்பினர். எனவே கடவுளுக்கு விலங்குகளை பலியிடுவதன் மூலமும், வேண்டுதல்கள் மற்றும் ஒலி எழுப்பும் கருவிகள் மூலம் கெட்ட ஆவியை பயமுறுத்தி வலியை குணமாக்க முயற்சித்தனர். தென் அமெரிக்கர்கள் முரட்டுத்தனமான trepanation எனப்படும் தலையில் துளையிடும் முறையை வலி போக்க பயன்படுத்தியுள்ளனர்.

அதன் பின் வந்த பண்டைய காலங்களில் வலியிலிருந்து தப்பிக்கவும், நிவாரணம் பெறவும் பல வகையான மருத்துவ முறைகள் உபயோகிப்பட்டுள்ளன. 

அவற்றில் ஒன்று நபி ஸல் அவர்கள் செய்த, பரிந்துரைத்த குருதி உறிஞ்சியெடுத்தல் எனப்பட்ட ஹிஜாமா. இம்முறையை சீனர்கள், எகிப்தியர்கள் மற்றும் ரோமர்களும் கடைபிடித்துள்ளனர்.

16-ஆம் நூற்றாண்டில் ஓபியம், மார்ஃபைன் போன்ற போதை மருந்துகளை வலி நிவாரணியாக பயன்படுத்தும் வழக்கமிருந்தது. இவை சிறந்த பயனைத் தந்தாலும் அந்த போதைக்கு மக்களை அடிமையாக்கியது.
இவ்வாறு சென்று கொண்டிருந்த வலி மருத்துவத்தில் 19-ஆம் நூற்றாண்டில் ஒரு சிறந்த கண்டுபிடிப்பு நிகழ்த்தப்பட்டது. இதைக் கண்டுபிடித்தவர் ஹிப்போக்ரடீஸ். வில்லோ மரத்தின் மரப் பட்டையில் சிறு பகுதியை வாயில் வைத்து சூயிங்கம் போல மென்றால் வலி குணமானதை கண்டறிந்தார். அவ்வாறு மெல்லும்போது பிரசவ வலி கூட குறைந்ததாம். வில்லோ மரத்தின் பட்டைகளில் சாலிசைலிக் அமிலம் உள்ளது என்பதையும், அது வலியையும் , காய்ச்சலையும் போக்க உதவுகிறது என்பதையும் அப்போது விஞ்ஞானிகள் தெளிவாக தெரிந்து வைத்திருக்கவில்லை.
ஆனால் சோதனையாக இச்சாறு பக்க விளைவை ஏற்படுத்தியது . உபயோகித்தவர்களுக்கு தலைவலி போய் வயிற்றுவலி வந்தது. 1899 -ல் பிரெஞ்சு நாட்டை சேர்ந்த சார்லஸ் ஜெர்ஹார்ட் ( Charless Gerhardt ) என்பவர் இந்த சாலிசைக்ளிக் அமிலத்தோடு அசிடைல் குளோரைடு என்னும் ரசாயனத்தை சேர்த்தால் பக்க விளைவு வருவதை தடுக்க முடியும் என்பதை கண்டறிந்தார். ஆனால் இதை தயாரிக்க அதிகமான நாட்கள் பிடித்ததால் அந்த முயற்சியை கை விட்டார்.


அதே பாதையில் இன்னொரு விஞ்ஞானியும் ஆராய்ச்சி செய்தார். அவர் பேயர் நிறுவனத்தில் ஆராய்ச்சியாளராக வேலை பார்த்துக் கொண்டிருந்த ஜெர்மனியை சேர்ந்த ஃபெலிக்ஸ் ஹாஃப் மேன். இவர் 1868 ஆம் ஆண்டு ஜனவரி 21 அன்று லூட்ஸ்விக்ஸ்பெர்க் என்ற ஜெர்மானிய ஊரில் பிறந்தவர்.

தொழிலதிபரான இவரின் தந்தை மூட்டு வலியால் வேதனைப்படுவதை பார்க்க இயலாமலேயே இவர் இவ்வாராய்ச்சியில் தீவிரமானார்..மூட்டுவலிக்கு சாலிசலைட் மருந்தை தொடர்ந்து உட்கொண்ட இவரின் தந்தை கடும் வயிற்றுவலியால் பாதிக்கப்பட்டதை தொடர்ந்து சாலிசைக்ளிக் அமிலத்தின் அமிலத்தன்மையை குறைக்க `அசிட்டைல்' என்ற ரசாயனப் பொருளை கலந்து , அந்த மாத்திரையின் தீமையை குறைத்தார்.

இதைத் தொடர்ந்து எளிதாக தயாரிக்க முடிந்த அசிட்டைல்சாலிசைக்ளிக் அமிலம் உதயமானது. வருடக்கணக்காக வலியில் சிரமப்பட்ட ஹாஃப்மேனின் தந்தைக்கு இம் மருந்து சிறந்த நிவாரணத்தை அளித்தது.

ஆஸ்பிரின் என்ற பெயரில் இம் மருந்து உலகப் புகழ் பெற்றது. 1899- ல் ஜூலையில் பேயர் நிறுவனம் இதை பவுடராக சந்தைப்படுத்தியது. பின்பு 1914 ஆம் ஆண்டிலிருந்து மாத்திரைகளாகவும் கிடைக்க ஆரம்பித்தது.

இம் மாத்திரையின் வலி குறைக்கும் அறிவியல் பின்னணி, பிரிட்டிஷ் விஞ்ஞானி ஜான் வேன் என்பவரால் 1971- ல் கண்டுபிடிக்கப்பட்டது.

மாரடைப்பு ஏற்பட வாய்ப்பு உள்ளவர்கள் தினமும் ஒரு ஆஸ்பிரின் சாப்பிட்டால் மாரடைப்பை தடுக்கலாம் என்று 1940 களின் இறுதியில், லாரன்ஸ் க்ரேவன் ( Laurence Craven ) என்பவரால் கண்டுபிடிக்கப்பட்டது. தற்போது வலி நிவாரணியாக பயன்படுவதை விட, இதய நோய்களை தடுக்கும் மருந்தாகவே ஆஸ்பிரின் அதிகமாக பயன்படுகிறது.

இதய மருத்துவர் , உயர் இரத்த அழுத்த நோயினால் பாதிக்கப்பட்டு மாரடைப்பு வரும் அபாயத்திலிருந்த என் அம்மாவுக்கு பரிந்துரைத்து ,அவர்கள் பல வருடங்கள் ஆஸ்பிரின் எடுத்து கொண்டு ஆரோக்கியமாய் வாழ்ந்ததை இங்கு குறிப்பிட விரும்புகிறேன்.

விண்வெளி வீரர்களின் பெட்டியிலும் இடம் பெற்றிருந்த பெருமை ஆஸ்பிரினுக்குள்ளது.

அத்துடன் அல்சைமர் நோய் , குழந்தையின்மை, புற்றுநோய், திடீரென பார்வை பறி போகும் நிலை போன்றவற்றிற்கெல்லாம் ஆஸ்பிரின் பலனளிக்கிறது..இது மருத்துவர்களால் நிரூபிக்கப்பட்டுள்ளது.

ஆஸ்பிரினை சாப்பிடுமுன் கவனிக்க வேண்டியவை :
ஹீமோஃபீலியா, வயிறு சம்பந்தமான உள்ளுறுப்புகளில் இரத்தம் கசியும் பிரச்சனை உள்ளவர்கள், (நான் ஸ்டீராய்டல் ஆன்டி இன்ஃப்ளம்மேட்டரி ட்ரக்) NSAID வலி நிவாரணி மாத்திரைகளுக்கு அலர்ஜியாகும் உடல்நிலை உடையவர்கள், மற்றும் ஃப்ளு, சின்னம்மை போன்ற நோய்களால் பாதிக்கப்பட்ட இள வயதினர் மற்றும் குழந்தைகளுக்கு ஆஸ்பிரின் கொடுக்க கூடாது.

மேலும் Reye's syndrome என்ற மோசமான பாதிப்பை குழந்தைகளுக்கு ஏற்படுத்தும் தன்மையுள்ளதால் கவனத்துடன் குழந்தைகளுக்கு பரிந்துரைக்கப்படுகிறது.

கர்ப்பிணி பெண்களும், பாலூட்டும் தாய்மார்களும் ஆஸ்பிரின் எடுப்பது நல்லதல்ல.
இன்றும் உலகில் அதிகமாக விற்பனையாகும் மாத்திரைகளில் ஒன்றாக ஆஸ்பிரின் உள்ளது.

எழுதியவர் சகோதரி. Nadhira Deen


ஆதார சுட்டிகள் :
read more "வலி நிவாரணி "

Monday, April 10, 2017

மின்னல் பற்றிய ஆராய்ச்சி


டீக்கடை என்னும் முகநூல் குழுமம் நடத்திய அறிவியல் கட்டுரைப் போட்டிகளில் பெண்கள் எழுதிய கட்டுரை பிரத்யேக அனுமதியுடன் உங்கள் இஸ்லாமிய பெண்மணியில் வெளியிடப்படுகிறது. அனைவரும் படித்து உங்கள் அறிவியல் அறிவை வளர்த்துக் கொள்ளுங்கள்...

தன் மகளின் பள்ளிப் பாட புத்தகத்தின் அனுபவத்துடன் மின்னல் பற்றி தனது அறிவியல் ஆராய்ச்சியை துவங்கும் சகோதரி.Umm Afnan (மூன்றாமிடம் பிடித்த கட்டுரை) 


மின்னல் 


போனவாரம் என் சின்ன மகள் பள்ளிக்கு போய் வந்து அம்மா உனக்கு ஒரு இன்ட்றஸ்ட்டிங்க் ஸ்டோரி சொல்லவா என கண்கள் விரிய கேட்டாள் சொல்லுடா தங்கம் என்றேன்.....அப்போ எனக்கு இப்படி எழுத தோணல, ஆனால் அவள் பள்ளியில் நடந்த பாடத்தை பற்றி சொல்ல ஆரம்பித்தவுடன் , அறிவியல் பற்றி எழுத சொன்னாங்களே போனவாரம் மகள் சொன்னதை எழுதலாமே என தோன்றியது. அதன் விளைவாக உருவானதே மின்னல் பற்றிய ஆராய்ச்சி பதிவு.

ஹைஃபா: இன்னைக்கு எங்க டீச்சர் மின்னல் பற்றி பாடம் எடுத்தாங்கமா செம இன்ட்றஸ்ட்டிங்க்கா இருந்துச்சு நீயும் கேளேன் என மகள் விழிகள் விரிய சொல்லவும் நான் கேட்க ஆரம்பித்தேன்.
ஹைஃபா: எப்படி உருவாகுது தெரியுமா?
நான்: தெரியாதே...
ஹைஃபா:: மேகங்கள் மூலம்தான் உருவாகுதாம். ஒன்றாகத் திரண்டு நிற்கும் மேக மலையின் மேற்பகுதியில் உள்ள ஆலங்கட்டிகள், அதிகம் குளிர்ந்து போன நீர்ப்பகுதிகள் மற்றும் பனித்துகளின் மேல் விழும் போது மேகங்கள் மின் காந்தப் புலன்களைப் பெற்று விடுகின்றன. இந்த நேரத்தில் குளிர்ந்த நீர்பபகுதிகள் மற்றும் பனித்துகள்களிலிருந்து எலக்ட்ரான்கள் கிளம்பி சூடான ஆலங்கட்டிகளை நோக்கித் தாவுகின்றன. அதனால் ஆலங்கட்டி எதிர் மின்னூட்டத்தையும் குளிர்ந்த நீர்ப்பகுதிகள் மற்றும் பனித்துகள்கள் நேர் மின்னூட்டத்தையும் பெறுகின்றன இவை இரண்டும் உரசுவதாலேயே நமக்கு மின்னல் தெரிகிறதாம் வேகமான இடி சத்தத்தையும் நாம் கேட்கிறோம் என்று டீச்சர் சொன்னாங்கமா.
இடியின் சத்தம் நம் காதுகளை எட்டும் முன் மின்னலோட வெளிச்சத்தை நாம் பார்க்க முடியும் என கூறி அதன் வேகம் பற்றி சொன்னாங்க. எனக்கு புரியல, ஆனால் இரண்டும் ஒன்றுதான் பட் ஒலியை லேட்டாகவும் ஒளியை விரைவாகவும் பார்க்கிறோம் என்பதை மட்டும் புரிந்து கொண்டேன்.

( மின்னல் ஒளியோட வேகம் பூமியை அடைய எடுத்துகொள்ளும் வேகம் ஒரு வினாடிக்கு 300000000 மீட்டராம், இடியோட ஒலி பூமியை அடைய எடுத்துக்கொள்ளும் நேரம் ஒரு வினாடிக்கு 340 மீட்டராம்)

இப்படி ஏற்படும் இந்த மின்சாரம் பூமிக்கு வருகிறது
இதன் விளைவாக நேர் மின்னூட்டம் பெற்ற சின்னஞ்சிறு பனித்துகள்கள் உடைந்து சிதறுகின்றன. சிதறிய சின்னஞ்சிறு சிதறல்கள் மேகத்தின் மேற்பகுதிக்கு எடுத்துச் செல்லப்படுகின்ற போது ,அங்கு ஏற்கனவே எதிர் மின்னூட்டத்தைப் பெற்றிருக்கின்ற ஆலங்கட்டிகள் மேகத்தின் அடிப்பாகத்தில் விழுகின்றன.


கீழே விழுந்த ஆலங்கட்டிகளின் எதிர் மின்னூட்டங்கள் தான் மின்னல் வெட்டுவதன் மூலம் வெளியேற்றப் படுகின்றன. இந்த மின் வெட்டு தன்னைச் சுற்றிலும் உள்ள காற்றை 30,0000 "ஈ" அளவுக்கு வெப்பப் படுத்துகின்றது. இது சூரியனின் மேற்பரப்பிலுள்ள வெப்பத்தை விட 5 மடங்கு அதிகமாகும். (சூரியனின் மேற்பரப்பு வெப்பம் 60000 ) இந்த அளவுக்கு வெளியாகும்
பூமிக்கு வரக்கூடிய மின்சாரம் தனக்கு அருகில் எது இருக்கிறதோ அதன் மீது முதலில் படும்.
எனக்கு மிகப்பெரிய ஆச்சரியமான விஷயங்கள் என் மகள் தான் கற்றதை என்னிடம் சொன்னாள்.

எச்சரிக்கை


ஹைஃபாமின்னலை பார்த்தால் நாம் என்ன செய்யனும் தெரியுமா உயரமான கட்டிடங்கள் அருகில் நிற்க கூடாது, அதன் அருகில் தாழ்வான கட்டிடம் இருந்தால்  நிற்கலாம்.

உயரமான மரங்களருகில் நிற்க கூடாது, அதன் அருகில் உயரம் கம்மியான மரமிருந்தால் நிற்கலாம். வெட்டவெளியான பூமியில் நம் பாடி பார்ட் எதுவும் படாமல் செப்பல் போட்டிருந்தால் செப்பல் மட்டும் பூமியில் படற மாதிரி உட்காரலாம். அப்பதான் நமக்கு மின்னலிலிருந்து வெளிப்படும் மின்சாரத்தால் பாதிப்பில்லை

நான்: ஏன் உயரத்திற்க்கு பக்கத்தில் நின்றால் தாக்கும், வெட்டவெளியில் தாக்கும்? உயரம் கம்மி பில்டிங் பக்கத்தில் இருந்தால் நிற்கலாம்னு சொல்றியே ஏன்? நாம் ஃப்ளைட் உயரமாதானே பறக்கிறோம் காரில் வெட்ட வெளியில் போகிறோம் அப்ப ஏன் தாக்கவில்லை?
ஹைஃபா: சின்ன சிரிப்புடன் ஹய்யோ அம்மா தனக்கு நியரஸ்ட்டா எது இருக்கோ அதன் மேலதான் மின்சாரம் படும் உயரமான பில்டிங்ல படும் அப்ப பக்கத்துல நீ நிற்க கூடாது.
கார் மற்றும் ஃபிளைட்டில் பெயின்டுக்கு உள்ளே பிளாஸ்டிக் மேற்பரப்பு வச்சுதான் தான் தயாரிப்பாங்க. அறிவியலை படிச்சுட்டுதான் அவங்க பிரிகாஷனோட தயாரிப்பாங்க.
வெட்டவெளில நீ நடக்கும்போது செப்பல் போட்டிருந்தா உன்னை மின்சாரம் தாக்காது. அந்த சமயம் பூமியில் உன் பாடி பார்ட்ஸ் எது பட்டாலும் அம்புட்டுதான்
நான்: ஹைஃபா!!!!!! 
இப்பதான் என் அம்மம்மா மேகம் இருண்டால் திட்டுவது நினைவுக்கு வருது. வானம் கருக்குது மின்னல் வெட்டும் பச்சை மரத்துக்கு கீழே நிக்காதீங்க வெளியே தனியா போகாதீங்க எதாச்சும் ஒரு மரத்துக்கு கீழே ஒதுங்காதீங்க இப்படிலாம் சொல்வாங்க.

துஆவும் ஓத சொல்வாங்க.

ஏனு கேட்டால் தென்னைமரம், பனை மரத்துல இடி இறங்கும்னு சொல்வாங்க. நானும் அது போன்ற சமயங்களில் சில நேரம் மரங்கள் எரிவதை கண்ணால பார்த்து இருக்கிறேன்.மின்னலில் உருவாகும் மின்னூட்டதின் கசிவினால் ஏற்படும் ஷாக்லதான் மரம் எறிஞ்சுச்சுனு இப்பதான் புரியுது மகளே!!

மின்னல் தாக்கி விவசாயி சாவுனு படிச்சிருக்கேன், அவங்க செருப்பு போடாமத்தான் எங்க காலத்துல நடப்பாங்க ஹைஃபா
ஹைஃபா: ஓஹ் அப்ப கிரேன்டகிரேன்ட்மாக்கு தெரிஞ்ச பாதுகாப்பு கூட உனக்கு தெரியலை வெரிகுட் மம்மி.
(மேற்கூறியது அனைத்தும் கடந்த வாரம் நடந்தது)

இன்று காலை 
நான்: அல்லாஹ் குர்ஆனில் மின்னலை பற்றி சொன்னதையும் படிக்கும்போது எனக்கு ஆச்சரியமா இருக்கு ஹைஃபா!!!
ஹைஃபா: மா கிரியேசன்ஸ் தான் இப்படி ஒன்று ஒன்றா ஆராய்ச்சி செய்து கண்டு பிடிக்கனும், ஆச்சரியபடனும். அவன் அனைத்துக்கும் கிரியேட்டர்மா ஹி நோஸ் ஆல் மா.....
அல்லாஹ் மேகங்களை இழுத்து அவற்றை ஒன்றாக்குவதையும், பின்னர் அதை அடுக்கடுக்காக அமைப்பதையும் நீர் அறியவில்லையா? அதன் மத்தியில் மழை வெளிப்படுவதைக் காண்கிறீர்! வானத்திலிருந்து அதில் உள்ள (பனி) மலைகளிலிருந்து ஆலங்கட்டியையும் இறக்குகிறான். தான் நாடியோருக்கு அதைப் பெறச் செய்கிறான். தான் நாடியோரை விட்டும் திருப்பி விடுகிறான். அதன் மின்னொளி பார்வைகளைப் பறிக்கப் பார்க்கிறது. (அல்குர்ஆன் 24:43)
அச்சத்தையும், எதிர்பார்ப்பையும் ஏற்படுத்தக் கூடியதாக அவனே மின்னலை உங்களுக்குக் காட்டுகிறான். பளுவான மேகங்களையும் அவன் உருவாக்குகிறான். இடியும் அவனைப் புகழ்ந்து போற்றுகிறது. அவனைப் பற்றிய அச்சத்தினால் வானவர்களும் (புகழ்ந்து போற்றுகின்றனர்). இடி முழக்கங்களையும் அவனே அனுப்புகிறான். தான் நாடியோரை அவற்றின் மூலம் தண்டிக்கிறான். அவர்களோ அல்லாஹ்வைப் பற்றி தர்க்கம் செய்கின்றனர். அவன் வலிமை மிக்கவன். (அல்குர்ஆன் 13:12,13)
மின்னலுக்கு ஏன் எதிர்பார்ப்பு என்ற வார்த்தையை அல்லாஹ் பயன்படுத்த வேண்டும்? என்ற விளக்கத்தைக் காண நாம் களமிறங்குவோம்.
வளி மண்டலத்தில் நைட்ரஜன் 78 சதவிகிதமும், ஆக்ஸிஜன் 21 சதவிகிதமும், கார்பன் டை ஆக்ஸைடு 0.033 சதவிகிதமும், ஆர்கான், நியான், ஹீலியம், மீதேன், ஹைட்ரஜன் ஆகிய வாயுக்கள் மிகக் குறைந்த அளவிலும் கலந்துள்ளன.
ஒரு தடவை மின் வெட்டி மறையும் போது, ஏதோ மின் வெட்டி மறைகின்றது என்று நாம் கண் சிமிட்டி விட்டு அதைக் கண்டு கொள்ளாது விட்டு விடுகின்றோம். ஆனால் ஒரு தடவை மின்னல் வெட்டுகின்ற போது அங்கு ஒரு கல்யாணமே நடந்து முடிகின்றது.
ஆம்! காற்றிலுள்ள 78 சதவிகித நைட்ரஜனும் 21 சதவிகித ஆக்ஸிஜனும் ஒன்றாகக் கலந்து கை கோர்க்கின்றன. இதனால் பிறக்கின்ற குழந்தை தான் நைட்ரேட்டுகள்! நைட்ரஜனும் ஆக்ஸிஜனும் ஒன்று சேர்ந்ததும் நைட்ரேட் உருவாகின்றது. இந்த நைட்ரேட்டுகள் மழை நீருடன் கலந்து நீர்த்த நைட்ரிக் அமிலமாக மாறி மழையாகப் பொழிகின்றது.
வளி மண்டலத்திலுள்ள இந்த நைட்ரஜனை ஏற்கனவே மண்ணில் உள்ள பாக்டீரியாக்கள் கவர்ந்து நைட்ரேட்டுகளாக மாற்றுகின்றன! இந்தப் பணியை மின்னல் வந்து பாய்ந்து வளி மண்டலத்தில் உள்ள நைட்ரஜன்களை உடைத்து அமிலமாக, சத்தாக, சாறாக மாற்றி மழை நீருடன் ஆறாக ஓடச் செய்கின்றது.
மண்ணுக்குள் கால்சியம், இரும்பு, அலுமினியம் போன்ற கனிமங்கள் இருக்கின்றன. அந்தக் கனிமங்களுடன் இது கலக்கும் போது அவற்றின் நைட்ரேட்டுகள் உருவாகின்றன. கால்சியத்துடன் கலக்கும் போது கால்சியம் நைட்ரேட்டு உருவாகின்றது. இவை தான் மண்ணில் விளைகின்ற தாவரங்களுக்கு இயற்கை உரமாகப் பயன்படுகின்றன. இவற்றை நேரடியாக மனிதன் சாப்பிடுவதன் மூலமோ அல்லது இவற்றைச் சாப்பிடும் ஆடு, மாடுகளின் இறைச்சியைச் சாப்பிடுவதன் மூலமோ மனிதன் நைட்ரஜனைத் தன் உடலில் சேர்த்துக் கொள்கின்றான்.
மனிதனுடைய உடலில் ஒட்டிக் கொண்டிருக்கும் இந்த நைட்ரஜன் அவன் இறந்தவுடன் மீண்டும் அது மண்ணிலேயே போய் சேர்ந்து விடுகின்றது. மனித உடலில் மட்டுமல்லாது மொத்த உயிரினங்களின் உடலிலும் நைட்ரஜன் கலந்து அந்த உயிரினங்கள் மடிந்ததும் மண்ணில் கலந்து விடுகின்றது. பின்னர் மீண்டும் காற்றிலேயே கலந்து விடுகின்றது. இதற்குப் பெயர் தான் நைட்ரஜன் சுழற்சி என்று வழங்கப்படுகின்றது.
சுப்ஹானல்லாஹ்! அல்லாஹ் மின்னலுக்கு ஏன் எதிர்பார்ப்பு என பெயர் வைத்தான் என்ற உண்மை நமக்கு மின்னல் போல் பளிச்சிடுகின்றதல்லவா? மிகப் பெரிய ஆற்றலாளான அவன் நைட்ரஜன், ஆக்ஸிஜன் என்ற பின்னல்களில் மின்னலைப் பாய்ச்சி நம்மை வாழ வைக்கின்றான். நாம் எப்படி அவனுக்கு நன்றி செலுத்த மறந்தவர்களாக இருக்கின்றோம் என்பதை எண்ணிப் பார்ப்போம்!
(மிஃராஜ் போன புராக் பற்றி புகாரியில் 3207)
புராக் எனும் மின்னல் வேக வாகனம் என்னிடம் கொண்டு வரப்பட்டது என அல்லாஹ்வின் தூதர் சொன்னதாக ஹதீதில் பதியப்பட்டிருக்கிறது.

நாம் மின்னலின் வேகத்தை பார்த்தோம். ஒரே இரவில் இந்த வேகம் இருந்ததாலேயே விண்வெளிக்கு போய் நபியவர்கள் திரும்பி இருக்காங்க அல்லாஹு அக்பர்.  சுப்ஹானல்லாஹ்...
மின்னல் வெட்டும் போதும், இடி இடிக்கும் போதும் நபி(ஸல்) அவர்கள் இந்த துஆவை ஓதினார்கள்.
اَللّهُمَّ لَا تَقْتُلْنَا بِغَضَبِكَ وَلَاتُهْلِكْنَا بِعَذَابِكَ وَعَافِنَا قَبْلَ ذالِك

பொருள்- யாஅல்லாஹ்.. உனது கோபாத்தால் எங்களைக் கொன்று விடாதே, உனது வேதனையால் எங்களை அழித்து விடாதே.. மாறாக அதற்கு முன் எங்களுக்கு நலத்தைத் தருவாயாக...(திர்மிதீ)

யா அல்லாஹ் அனைத்து பிள்ளைகளுக்கு ஈருலகக் கல்வியிலும் விளக்கத்தை பெறும் ஆற்றலை தருவாயாக ஆமீன்.

read more "மின்னல் பற்றிய ஆராய்ச்சி"

Thursday, March 23, 2017

வரதட்சணையும் பெண்களும்


கோபிநாத் அந்த பெண்களை நோக்கி உங்களுக்கு உரைக்கவே இல்லயா..வரதட்சணை க்கு எதிராக ஒரு போரை நடத்திய சமுதாயத்தில் இந்த எண்ணம் உங்களுக்கு ஏன் வந்தது என்று கேட்கிறார்..

ஆக்சுவலி அவர் அந்த கேள்வியை தன்னைத்தானே கேட்டுக்கொள்ள வேண்டும்..

அங்கொன்றும் இங்கொன்றுமாக இது போன்று நினைக்கும் பெண்களை ஒட்டுமொத்தமாக ஒரே இடத்தில் அமர்த்தி என்னமோ எல்லா பெண்களுமே இப்படித்தான் போல என்ற மனநிலையை பிம்பப்படுத்தியுள்ள நீயா நானாவைப் பார்த்துதான் இந்த கேள்வி கேட்கப்பட வேண்டும்.

இதை தொடர்ந்து சகோதரி ஹுசைனம்மா தன்  பேஸ்புக் பக்கத்தில் பதிந்த கருத்து கவனத்தை ஈர்த்தது. அதை அப்படியே கீழே தருகிறேன் :
நான் கல்லூரி படிக்கும்போது, அத்தையின் கல்லூரித் தோழியின் திருமணத்திற்குச் சென்றிருந்தேன். “கிராண்டாக”வே நடந்தது திருமணம். அத்தையுடன் மற்ற தோழிகளும் பேசிக் கொண்டிருந்தார்கள். அப்போது அவர்களின் பேச்சிடையே அடிபட்ட ஒரு வார்த்தை என் கவனத்தை ஈர்த்தது - “விடுதலைப் பத்திரம்”!! அப்போது கேட்க முடியாததால், பின்னர் கல்லூரி தோழிகளிடம் கேட்டபோது விளக்கம் கிடைத்தது. திருமணமாகிச் செல்லும் பெண் - தன் தந்தை மற்றும் சகோதரர்களின் சொத்துக்களின் மீது தனக்கு எந்தப் பாத்தியதையும் கிடையாது என எழுதிக் கொடுத்துவிட்டுச் செல்வதே “விடுதலைப் பத்திரம்”!! அவளுக்குச் சேர வேண்டியதை எல்லாம் திருமணத்தின்போதே கணக்குப் பார்த்தோ, பார்க்காமலோ பிரித்துக் கொடுத்துவிட்டு, அதன் பிறகு மீதி இருக்கும் சொத்துக்களை அவள் எவ்விதத்திலும் உரிமை கோராமல் இருக்க உதவும் பாதுகாப்பு கவசம் இந்த ’விடுதலைப் பத்திரம்”. இது எந்தெந்த சமூகங்களில் வழக்கம் என்பதெல்லாம் தெரியவில்லை. பொதுவாக இந்து மற்றும் கிறிஸ்தவ சமூகங்களில் இது செல்லுபடியாகும் என்று நினக்கிறேன். 
என்னுடன் வேலை பார்த்த ஒரு பெண், வேறு சாதியில் ஒருவரை காதலித்ததால், அவரைத் திருமணம் செய்வதற்கான நிபந்தனையாக இப்பத்திரம் எழுதிக் கொடுத்தார்.
இஸ்லாமிய சமூகங்களில் இரத்த பந்தங்களை இம்மாதிரி விடுதலைப் பத்திரங்களினால் இரத்து செய்து விட முடியாது என்பதால் முஸ்லிம்களிடையே அது பரவவில்லை என்று நினைக்கிறேன். இருப்பினும், அதற்கும் (இபிகோ படி) வேறு வழிமுறைகள் கண்டுபிடித்திருப்பார்கள்.
இதையெல்லாம் பார்க்கும்போது, அப்பெண்கள் பேசியதன் பின்ணணி புரிந்தாலும், ஏற்றுக் கொள்ள முடியவில்லை. இருதரப்பிலும் தவறுகள் உள்ளன.
இதெற்கெல்லாம் ஒரே தீர்வு, திருமணங்கள் மிக மிக மிக எளிமையாக்கப்பட வேண்டும். சீர்கள் ஒழிக்கப்பட வேண்டும். இவைகளையும் செய்துவிட்டு, சொத்தும் கொடுக்க வேண்டும் என்பதால்தான் பிரச்னையே வருகிறது. பெற்றோர் எல்லா பிள்ளைகளுக்கும் - ஆண், பெண் பேதமின்றி - அன்பை மட்டுமல்ல, செய்யும் செலவுகளையும் சமமாகச் செய்ய வேண்டும்!! 
தன் பிள்ளைகளில் தனக்குப் பிடித்த ஒரு மகனுக்கு மட்டும் ஒரு ஒட்டகம் பரிசளிக்கப் போவதாகச் சொன்ன ஒரு தந்தையிடம், நபியவர்கள், “என்னே!! அநீதிக்குத் துணை நிற்கவா என்னை சாட்சியம் கூற அழைத்தீர்??!! உமது மக்களிடம் பாரபட்சத்துடன் நடந்து இறைவனின் அதிருப்திக்கு ஆளாகாதீர்!! #உம்_மக்கள்_அனைவரும்_உம்மிடம்_ஒரேவிதமாக_பாசமும்_மரியாதையும்_செலுத்த_வேண்டும் என்று நீர் விரும்பவில்லையா?” என்று கோபத்துடன் வினா எழுப்பினார்கள். 

இதே பதிவின் கீழ் சகோதரி ஆமினா முஹம்மத் தன் கருத்தை பதிவிட்டிருந்தார் இப்படியாக,
சீர் , நகை, நட்டு, வரதட்சணை , மறுவீடு, வளகாப்பு , புள்ள பெக்க சீரு, , பிரசவ செலவு, அந்த புள்ளைக்கு காது குத்து சீர், சுன்னத் க்கு தாய்மாமன் சீர், பொண்ணு வயசுக்கு வந்தா அதுக்கும் சீரு, அந்த புள்ளைக்கு கல்யாணம் ஆனா கூட தாய்மாமன் சீர் னு - மொத்தமா மொட்டையடிக்காம இருந்தா சொத்தை விட்டு தர சகோதரனுக்கோ, தந்தைக்கோ கொஞ்சமாச்சும் மனசாட்சி வரும்! 
காலம் முழுக்க தன் சகோதரி க்கு அவளின் புகுந்த வீட்டில் பெருமையாக பேசப்பட சகோதரன் எப்போதும் செலவு செய்ய வேண்டியவனாக இருக்கிறான். 
இம்புட்டும் செஞ்சு கொடுத்துட்டு சொத்தும் வேணும்னு ஒரு பெண் எதிர்பார்ப்பது ரொம்ப அபத்தம் தானே! அதே மனநிலை தான் பெண்ணுக்கும் இருக்கும்... நமக்கு இதெல்லாம் செய்றதோட பெத்தவங்க கடமை முடிச்சுக்குவாங்க, அதுனால நமக்கு சேரவேண்டியதை நாம் தான் கரெக்ட்டா புடுங்கணும்னு அவளின் சுயநலம் வேலை செய்யத்தூண்டிவிடும் ! 
இருதரப்பின் பரஸ்பர புரிதல், மனசாட்சி இப்போதைக்கு ஒரு தீர்வு... சமூகமாற்றம் நிரந்தர தீர்வு !

நிகழ்ச்சிக்கு வருவோம்..(நிஜமாகவே இந்த நிகழ்ச்சியில் வெளிப்படுத்தப்பட்ட கருத்துகள் அந்த பெண்களின் சொந்த கருத்தாக இருந்தால்.. 

வெறுமனே பெண்களை குறை சொல்லக்கூடாது என்பதால் அலுவலகத்தில் திருமணம் ஆகாத சில பெண்களிடம் இந்த கேள்வியைக் கேட்டபோது அனைவருமே அப்படி எந்த எதிர்பார்ப்பும் தங்களுக்கு இல்லை என்றே ஒருமித்து கூறினர்.

இதுதான் உண்மை. நிதர்சனம்..99.99 சதவீதம் பெண்கள் தங்கள் பெற்றோர்கள் சிரமப்படுவதை விரும்புவதில்லை. மீதமுள்ள .01% பெண்களை 'பொறுக்கி' வந்து நிகழ்ச்சிக்கு திரைக்கதை, வசனம் எழுதியுள்ளனர்.

அதிலும் பேசிய பல பெண்கள் தங்கள் பெற்றோர்கள் கடனாளி ஆனாலும் பரவாயில்லை, சகோதரன் கஷ்டப்பட்டாலும் கவலையில்லை., சாகுற வரைக்கும் பென்சன் வரும்ல... உயிரோட இருக்கப்பவே எழுதிக் குடுத்துடணும்.. கணவனை என்னோட என் வீட்ல வச்சுக்குக்குவேன் என்று சொல்வது எல்லாம் மிகைப்படுத்தப்பட்டதாகவே தோன்றுகின்றது. உண்மையிலேயே அப்பெண்களின் மனநிலை அதுதான் என்றால் அது பிறழ்ந்த மனநிலைதான் என்பதில் சந்தேகமே இல்லை..

கல்வி பெற்ற திமிரில் பேசுகின்றார்கள் என்றால் சிறப்பு விருந்தினர் ராஜி சொல்லியது போல, கல்வி எந்தவித மாற்றத்தையும் இன்றைய இளைஞர்கள் மனதில் ஏற்படுத்தவில்லை..மேலும் மேலும் பண மோகம் பிடித்த பிசாசுகளாகவே உருமாற்றியுள்ளன..

இங்கே ஒரு சம்பவத்தை நினைவுபடுத்த விரும்புகின்றேன். வரதட்சணையை ஒழித்து மஹர் எனும் மணக்கொடை மூலம் தான் பெற்ற உரிமையை ஒரு முஸ்லிம் பெண் தனது அறிவைப் பெருக்கும் ஐம்பது புத்தகங்களை வாங்கித் தருமாறு மணமகனிடம் வைத்த கோரிக்கை மூலம் புதுமை புகுத்தினார். இதுதான் உண்மையான கல்வி மூலம் பெற்ற மாற்றமாக இருக்கமுடியும்..

தஞ்சாவூர் தாய் சொன்னது போல தன்னைச் சார்ந்தவர்களைப் பற்றி கவலை கொள்ளாமல், தான், எனது என்ற சிந்தனை மட்டுமே மேலோங்கியுள்ள இந்த பெண்கள் மூலம் உருவாகும் எதிர்கால சமுதாயத்தின் நிலையை மிகவும் வருத்தத்துடன் நினைத்துப் பார்க்கின்றேன்.

அடுத்தவர் உழைப்பில் சொகுசு வாழ்க்கை வாழ விரும்பும் இத்தகைய பெண்கள் திருமணத்திற்கு பிறகு தங்களது கணவன் எதும் ப்ரச்னையில் சிக்கி இந்த சுகபோகத்தை இழக்க நேரிட்டால் அந்த கணவனது நிலை மிகவும் பரிதாபம்.. தற்கொலை அல்லது விவாகரத்து இதுவே அவர்களது முன் இருக்கும் வாய்ப்புகள் என்றால் அது மிகையல்ல..

தங்களது பெற்றோர்களையே இப்படி சிரமப்படுத்த நினைக்கும் இத்தகைய பெண்கள் நாளை மாமியாராக மாறும்போது நிலை என்னாவது..?

இறைவா இந்த பெண்களுக்கும் பெண் குழந்தைகளையே பிறக்கச் செய்வாயாக.. இந்த நிகழ்ச்சியை அந்த குழந்தைகள் பார்க்கச் செய்வாயாக என்று உதடுகள் என்னையறியாமல் பிரார்த்திப்பது எனக்கு மட்டும்தானா..?

நடிப்பாகவே இருந்தாலும் என்னால் இவ்வளவுதான் சார் பண்ண முடியும் என்று கண்ணீருடன் பேசிய அந்தத் தாயின் வார்த்தைகள் இன்றைய பெரும்பான்மை நடுத்தர குடும்பத்து பெற்றோர்களின் நிலையை எடுத்தியம்புகின்றது..

நான் கொடுத்த கார்ல என் பொண்ணு வர்றான்னு சொல்றதுல எனக்கு எந்த பெருமையும் இல்ல..

இவ்ளோ கேக்குறறீங்கள்ல, அதுக்கு ஏத்த மாதிரி எதும் வேல பாக்குறீங்களா.. போத்திக்கிட்டு தூங்குறாங்க சார்.. நச்..நாக்கைப் புடுங்கிக்கலாம்.

இந்த நிகழ்ச்சியைப் பார்க்கும்போது புயலாக மாறிவிட்டுள்ள தென்றல்களையும் படிதாண்டி வந்துவிட்ட பாரதியின் புதுமைப் பெண்களையும் பெற்றுவிட்ட சமுகம் பாரதிதாசன் வர்ணித்த குடும்ப விளக்குகளை இழந்துவிட்டோமோ என்ற அச்சம் ஏற்படாமல் இல்லை.

என்னதான் மகன்கள் தாம் தம் எதிர்காலம் என்ற நம்பிக்கை பெற்றோரிடம் இருந்தாலும், கடைசிகாலத்தில் பாசத்தை எதிர்பார்ப்பது மகள்களிடமிருந்து தான். பெற்றவர்களுக்காக உங்கள் உள்ளங்களை அவர்கள் அளவுக்கு இல்லையென்றாலும் கொஞ்சமேனும் விசாலமாக்கிக்கொள்ளுங்கள் மகள்களே!

இறுதியாக ஒண்ணே ஒண்ணு..

இந்த பாழாய்ப் போன வரதட்சணையால் முப்பது வயதைக் கடந்தும் தங்கள் உணர்ச்சிகளை அடக்கிக் கொண்டு பெற்றோர்களுடனே வாழும் ஆயிரக்கணக்கான முதிர்கன்னிகளின் பாதங்களை இந்த பெண்கள் கழுவினால் இவர்களின் மனநிலை சுத்தமாகலாம்..

ஆக்கம் ,
ஷாரா ஹசன் ,
சென்னை. 
read more "வரதட்சணையும் பெண்களும்"

Wednesday, February 01, 2017

ஹிஜாப் பெண்களுக்கு மட்டும்தானா?



          “ஹிஜாப்என்ற சொல் இன்று பொதுவாக எல்லா சமூகத்தினரும் அறிந்த ஒன்றாகிவிட்டது. அநேக முஸ்லிம்களின் சமூக வலைத்தள பக்கங்களில் ஹிஜாப்போட்ட பெண்களின் படங்களுடன், ஹிஜாப் அணிவதால் விளையும் நன்மைகளும், போதிய பாதுகாப்பான உடை அணியாத பெண்களுக்கு நேரும் ஆபத்துகளும் கடமையுணர்வோடு எடுத்துரைக்கப்பட்டுக் கொண்டேயிருக்கின்றன

ஹிஜாப் என்றால் என்ன?

 
ஹிஜாப் என்ற அரபு வார்த்தைக்கு திரை, தடுப்பு, மதில் (curtain, barrier, screen, veil,  partition) என்று பல பொருட்கள் உண்டு. திரைஎன்ற அர்த்தம் இருப்பதால், து பெண்களுக்கான ஒன்றாக மட்டுமே கருதப்பட்டுவிட்டது போலும்!

ஹிஜாப் என்பது ஒரு தடுப்பு. எதற்கான தடுப்பு

எல்லாவற்றிற்கும் - எண்ணங்கள், செயல்கள், இச்சைகள், ஆடைகள் என ஐம்புலன்களுக்குமான தடுப்பு. வரம்பு மீற அனுமதிக்காத தடுப்பு. யாருக்கெல்லாம் ஹிஜாப் பொருந்தும்? "கற்புஎப்படி இருபாலருக்கும் பொதுவான ஒரு நிலையோ, அதுபோல இஸ்லாத்தில் ஹிஜாப்பும் இருபாலருக்கும் உரியதாகும்

ஃபோட்டோ ஷாப் உதவியோடு, மோடி என்றால் க்ளீன் கவர்னென்ஸ்என்று பதிய வைத்தது போல, ‘ஹிஜாப்என்றால் பெண்ணிற்கான கட்டுப்பாடுமட்டுமே என்ற எண்ணத்தை அனைவர் மனதிலும் ஆழப் பதிய வைத்துவிட்டார்கள். உண்மை அதுவல்ல. ஆடையில் மட்டுமல்ல கட்டுப்பாடு, பார்வை, செயல்கள், எண்ணங்களுக்கும் கட்டுப்பாடு உண்டு - ஆண் பெண் இருவருக்குமே.

டை என்று வரும்போது, ஆடையின் நீள-அகலத்தில் மட்டுமே ஆணுக்கும் பெண்ணுக்கும் வித்தியாசமான கட்டுப்பாடுகள். மற்றபடி, இறுக்கமானவை - மெல்லியவை - வசீகரிக்கும் தன்மை கொண்டவை - எதிர்பாலினத்தைப் போல காட்டும் உடை - ஆகியவற்றின் கட்டுப்பாடுகள் இருதரப்பிற்கும் உண்டு.

ஆண்களுக்கு பெண்களைப் போல முழு உடலையும் மறைப்பது கட்டாயமில்லை என்ற போதிலும், அவசியமின்றி உடலை வெளிப்படுத்துவதும் தவிர்க்கப் படவேண்டியதே என்பது இந்த நபிமொழியின் வாயிலாய் அறிந்துகொள்ளலாம்

'இறைநம்பிக்கையாளனின் வேட்டி (கீழங்கி, கால்சட்டை) அவனது கெண்டைக்காலில் பாதிவரை இருக்கும். அதனைவிடக் கீழேயும் கணுக்கால்களுக்கு மேலேயும் இருந்தால் அதனால் பாவம் ஏதுமில்லை. இன்னும் அதனைவிடக் கீழே இருப்பது நரகத்திற்குரியதாகும். (அதாவது அது பாவகரமான ஒரு செயல்) இந்தக் கடைசி வாக்கியத்தை மக்களுக்கு இதன் முக்கியத்துவமும் தெளிவாகிவிடட்டும் என்பதற்காக அண்ணலார் மூன்று முறை கூறினார்கள்.

முழுமையான ஆடை அணியுமளவு வசதி பெற்ற ஒருவர், தரையில் இழுபடும்படி ஆடையை இழுத்துக் கொண்டு வந்தபோது அவருக்கு கொடுக்கப்பட்ட அறிவுரை இது. இந்நாளில் ஆடைக்கு வசதியற்றவர் என்ற நிலையில் இல்லாதபோதும், கை, தொடை, இடுப்பு போன்றவை வெளியே தெரிந்துகொண்டிருக்க, தரையில் இழுபடும்படி உடை உடுத்தும் நாகரீகக் கோமாளிகள் அறிந்துகொள்ள வேண்டிய அறிவுரையாகும் இது!!

டைக்கு மட்டுமல்ல கட்டுப்பாடு!!



ஆண் பெண் இருவரின் “பார்வை”க்கு இருக்கும் கட்டுப்பாடுதான் மிக முக்கியமானது. குர் ஆனில், ஆண் – பெண் இருவருக்குமான வரம்புகளைக் கூறும்போது, இறைவன் முதலில் ஆணுக்கே கட்டளையிடுகிறான்:

நம்பிக்கை கொண்ட ஆண்களுக்கு நீர் கூறுவீராக!  அவர்கள் தங்கள் பார்வைகளைத் தாழ்த்திக் கொள்ள வேண்டும். தங்களின் வெட்கத் தலங்களை (கற்பை) பேணிக் காத்துக் கொள்ள வேண்டும். இது அவர்களுக்கு மிக பரிசுத்தமான செயலாகும். நிச்சயமாக அல்லாஹ், அவர்கள் செய்பவற்றை அறிபவனாக இருக்கிறான். (அல்குர்ஆன் 24:30)



ஆடை, எண்ணங்கள், செயல்களின் வரம்பு மீறாதீர்கள் என்று நேரடியாகச் சொல்லாமல், ”பார்வைகளைத் தாழ்த்திக் கொள்ளுமாறு”  கூறுவது ஏன்? பார்வை – அதுதான் தவறுகளின் தொடக்கப் புள்ளி!! பார்வையைக் கட்டுப்படுத்தாமல் விட்டால், நிச்சயம் அது மற்ற தவறுகளுக்கு இழுத்துச் சென்றுவிடும். 

கண்களும் விபச்சாரம் செய்கின்றன.


‘கண்களின் விபச்சாரம் பார்வை என்பதும் நபிமொழி. இன்றைய உலகில் இது எத்தனை உண்மை? பெண்கள் எங்கு சென்றாலும், அவர்களை ஆண்களின் பார்வைகள் பின் தொடருகிறது. அதைத் தவிர்க்கச் சொன்னால் உடனே, “நாங்க பார்க்கணும்னுதானே பெண்கள் இப்படி ஆடை அணிகிறார்கள்” என்று பதில் வரும்!!

பெண்களின் ஆடையைப் பொறுத்து பார்வையைத் தாழ்த்துமாறு ”சாய்ஸ்” கொடுக்கவில்லை இறைவன். மற்ற தவறுகளுக்கு இடம்கொடாமல் இருக்கவே பார்வையைத் தாழ்த்துமாறு உத்தரவிடுகிறான். 

பி (ஸல்) அவர்கள் கூறினார்கள்: "ஓர் அன்னியப் பெண் மீது திடீரெனப் பார்வை பட்டுவிட்டால் உடனே பார்வையை திருப்பிக் கொள்ளுங்கள். அவள் மீது இரண்டாவது பார்வையைச் செலுத்தாதீர்கள். முதல் பார்வை உம்முடையது; இரண்டாது பார்வை உம்முடையதன்று. மாறாக, ஷைத்தானுடையது"

தற்செயலாகப் பார்ப்பது தவறில்லை. ஆனால், உடனே பார்வையைத் திருப்பிக் கொள்ளவேண்டும். இல்லாமல், போனால், விளைவுகளுக்கான தண்டனைகளில் உங்களுக்கும் பங்குண்டு. ”அழகிகள் பிடிபட்டனர்” என்று பெண்களை மட்டுமே சிறையில் தள்ளும் இ.பி.கோ. போன்றது அல்ல இஸ்லாமியச் சட்டம்!! இருதரப்புக்குமே கடும் தண்டனை உண்டு!! கவனம்!! 

குர் ஆனில், இன்னின்ன உறவல்லாத ஆண்களின் முன்பு பெண்கள் ஹிஜாப் இன்றி வரக்கூடாது எனக் கூறப்பட்டுள்ள வசனத்தை (24:31) எடுத்துக் கொண்டு, பெண்களுக்கு எச்சரிக்கைகளை அள்ளி வீசும் ஆண்களுக்கு, அதில் கூறப்பட்டுள்ள உறவு முறையில் இல்லாத பெண்களைத் தான் ஏறிட்டுப் பார்ப்பதும் பாவமே என்கிற எண்ணம் வாராது போனது ஏன்?


ன்னும், பெண்களைத் தொடுவதிலிருந்தும் விலகிக் கொள்ள ஆண்களுக்குத்தான் உத்தரவிடப்படுகிறது. "உங்களில் ஒருவர் தனக்கு அந்நியமான  பெண்களைத் தொடுவதைவிட அவர் இரும்பினாலான ஊசியால் தனது தலையில் அடித்து காயம் எற்படுத்திக்கொள்வது சிறந்ததாகும்

திருமதி. மிஷெல் ஒபாமா, சவூதி சென்றபோது அவருக்கு அங்குள்ள அமைச்சர்கள் கைகொடுக்கவில்லை என்ற சர்ச்சை எழுந்தது நினைவிருக்கலாம். அதற்கு காரணம் இந்த வழிகாட்டலே.

எந்த ஆடவரும் ஒரு பெண்ணுடன் தனித்திருக்க வேண்டாம், ஏனெனில் சைத்தான் அவர்களில் மூன்றாமவனாக ஆகிவிடுகிறான்என்ற நபிமொழியும், அவ்வாறு தனிமையான சந்தர்ப்பம் அமைந்தால், அங்கிருந்து விலகிச் சொல்லும் பொறுப்பு ஆண்களுடையதே என்று தெரிவிக்கிறது. 

மூகத்தில் பெண்களுக்கான பாதுகாப்பை உறுதி செய்யக் கூடிய பல கட்டளைகளும் ஆண்களுக்கே கொடுக்கப்பட்டிருந்தும், பெண்களுக்கு நேரும் பாலியல் வன்முறைகளுக்கு அவர்களையே பொறுப்பாக்கி பலிகடா ஆக்குகின்றனர். பெண்களில் பெரும்பாலோனோர், தம்முடைய ஆடைகளில் கவனம் செலுத்தவே செய்கின்றனர். இருந்தும், பாலியல் வன்முறைகள் பெருகுவதற்கு ஆண்கள் தமக்கு விதிக்கப்பட்ட ஹிஜாபைப் பேணாததே முழுமுதற் காரணம் என்பதை மறுக்கவே முடியாது. ஆம், ஆண்கள் தம் “பார்வை”யை முதற்கண் தடுத்துக் கொண்டால், பாலியல் குற்றங்கள் ஆரம்பக் கட்டத்திலேயே தடுக்கப்பட்டுவிடும். இது, முஸ்லிம் ஆண்களுக்கான அறிவுரை மட்டுமல்ல, அனைத்து ஆண்களுக்கும் பொருத்தமானது. 

·    ஸ்லாமிய வரலாறு முழுதும் பெண்களுக்கான பாடங்கள் மட்டுமே இருப்பதாக கருதிக் கொண்டிருக்கும் ஆண்கள்,  வரலாற்றை மீண்டும் வாசித்துப் பார்க்கட்டும். யூசுஃப் (அலை) நபியை ஒரு அழகிய பெண் அழைத்தபோதும், மறுத்தால் சிறையில் அடைத்து வஞ்சிக்கப்படுவோம் என்று தெரிந்தும், இறைவனுக்கு மட்டுமே அஞ்சி மறுத்த வரலாறு ஆண்களுக்கானதுதான்.

·  வழியில் கண்ட பெண்ணை ஒரு ஆண் வைத்த கண் வாங்காமல் பார்த்தபோது, அந்த ஆணின் முகத்தைத்தான் நபிகளார் தன் கையால் பிடித்துத் திருப்பி விட்டாரே ஒழிய, அந்தப் பெண்ணைக் கடிந்து கொள்ளவில்லை!!

· உங்களில் ஒருவரது பார்வை ஒரு பெண்ணின் மீது விழுந்து (இச்சையைக் கிளறி)விட்டால், உடனே அவர் தம் மனைவியிடம் செல்லட்டும். ஏனெனில், அது, அவரது மனத்தில் தோன்றும் (கெட்ட) எண்ணத்தை அகற்றிவிடும்" என்பதுதான் பொது இடங்களில் உணர்ச்சி வயப்படும் சூழ்நிலை ஏற்படும்போது  பின்பற்ற வேண்டிய நபி (ஸல்) அவர்களின் அறிவுரை. இங்கும் ஆண்களுக்கே கட்டுப்பாடு அறிவுறுத்தப்பட்டுள்ளது!!

ஆகவே ஆண்களே, மாற்றத்தை உங்களிடமிருந்து துவங்குங்கள். பார்ப்பதற்கு நீங்கள் தயார் இல்லையெனும்போது, பார்க்கப்படுவதற்காகவே ஆடை அணிகிறார்கள் என்று நீங்கள் சொல்பவர்களும் திருந்திவிடுவார்கள்!! 

பெண்களே, உங்களின் உடல் கடைவீதிப் பொருள் அல்ல, அழகாக்கி பொதுமக்கள் பார்வைக்கு வைப்பதற்கு. உணர்வும், அறிவும், பலமும் கொண்டு ஆணுக்கு நிகரான வலிமையான படைப்பினம் என்பதை மறந்து உங்களே நீங்களே விற்பனைக்குள்ளாக்காதீர்கள்.

ரு கைகள் இணைந்தால்தான் ஓசை” என்பதாக, சமூகத்தில் பாதுகாப்பும், அமைதியும் நிலவ, ஆண் – பெண் இருதரப்புமே தம் பணியைச் சரியாகச் செய்தல் வேண்டும். பெண்கள் மட்டுமே சரியாக இருந்துவிட்டால் உலகில் எல்லாம் சீர்திருந்திவிடும் என்றால், இஸ்லாத்தில் முறையற்ற உறவு, பாலியல் வன்முறை, விபச்சாரம் ஆகியவற்றிற்கான தண்டனைகளுக்கான தேவையே இருந்திருக்காதே!! 

சாமானிய ஆணுக்கும், பெண்ணுக்கும் இருக்கும் கடமையை விட, சமூகத்தின் ஊடகங்கள் மூலம் எப்பொருளுக்கும் கவர்ச்சியூட்டி, போதைப்பொருள் போலாக்கி, ஆபாசத்தை அடையாளமாக்கி விளம்பரப்படுத்துபவர்களும் கவனிக்க வேண்டும், உங்களின் பொருள் விற்பனையாக வேண்டும் என்பதற்காக எங்கோ ஒரு மனதின் மூலையில் பாவத்தை விதைக்க வேண்டுமா?? யாரோ ஒரு பெண்ணின் அல்லது சிறுகுழந்தையின் வாழ்க்கை சீரழிய வேண்டுமா?? குடும்ப, சமூகப் பொறுப்புக்களை காக்க வேண்டிய புஜங்கள் பாவம் சுமக்க வேண்டுமா?? சிந்திப்பீர்களா??

உங்கள் சகோதரி,
ஹுசைனம்மா
 
read more "ஹிஜாப் பெண்களுக்கு மட்டும்தானா?"